دەمەوبەیانی ئەمڕۆ ١٧ی جۆزەردان (٨ی ژوئەن) هێزەکانی پاسەوانی سنووری ئێراق لە ناوچە سنوورییەکانی نێوان هەورامانی پارێزگای کرماشان و هەرێمی کوردستاندا تەقەیان لە دەستەیەک لە کۆڵبەران کردووە کە لە ئەنجامدا کۆڵبەرێکی لاو بە ناوی یاسر محەممەدکەریمی بریندار بووە.
تۆڕی مافەکانی مرۆڤی کوردستان ئاگادار کراوەتەوە کە کاتژمێر ٢:٣٠ دەقەی دەمەوبەیانی ئەمڕۆ لە نزەک ناوچەی سنووریی «بیارە»ی هەرێمی کوردستان، دەستەیەک کۆڵبەر کەوتوونەتە بەر تەقەی هێزەکانی پاسەوانی سنووری ئێراق و لە ئاکامی ئەم تەقەکردنەدا کۆڵبەرێک بە ناوی یاسر محەممەدکەریمی بریندار بووە.
ئەم کۆڵبەرەی خەڵکی گوندی «هانەگەرمەڵە»ی شاری پاوەی پارێزگای کرماشان، بۆ دەرمانکردن ڕەوانەی ناوەندێکی پزیشکیی شاری سلێمانی کراوە.
