هاووڵاتییەکی کورد بە ناوی عەلی ئوسلووب بە دەسڕێژی هێزەکانی وەزارەتی ئیتلاعات لە پیرانشار کوژرا

عەلی ئوسلووب، هاووڵاتیی ٣٥ ساڵانی خەڵکی پیرانشار، لە کاتێکدا بە ماتۆرسیکلێت لە نزیک گوندی «جڵدیان»ی ئەم شارەوە تێ دەپەڕی، کەوتە بەر دەسڕێژی هێزەکانی وەزارەتی ئیتلاعات و کوژرا.

تۆڕی مافەکانی مرۆڤی کوردستان زانیاریی بە دەست هێناوە کە ئێوارەی ٢٦ی خەرمانانی ١٤٠٥ (١٧ی سێپتامبەری ٢٠٢٦) ئەم هاووڵاتییەی خەڵکی گوندی «کێلەسیپان»ی پیرانشار بە ماتۆرسیکلێت لە جادەیەکی نزیک گوندی «جڵدیان»ـەوە دەڕۆات و لە ناکاو دەکەوێتە بۆسەی هێزەکانی وەزارەتی ئیتلاعاتەوە. ئەم هێزانە بە چەند جۆر چەکی وەک دۆشکە و کڵاشینکۆف دەسڕێژی لێ دەکات.

لە ئەنجامی دەسڕێژەکەدا چەندین گوللە بەر ئەم هاووڵاتییە دەکەوێت و دەسبەجێ گیانی بەخت دەکات، هێزەکانی وەزارەتی ئیتلاعاتیش دەست بەسەر تەرمەکەیدا دەگرن و دەیبەن.

بنەماڵەی ئەم هاووڵاتییە دوای ئاگاداربوونەوە لە ڕووداوەکە سەردانی فەرمانگەی داد (دادگوستەری) و ئیدارەی ئیتلاعاتی پیرانشاریان کردووە. بە وتەی سەرچاوە ئاگادارەکان، داواکاری گشتیی پیرانشار کوژرانی ئەم هاووڵاتییەی پشتڕاست کردووەتەوە و بە بنەماڵەکەی ڕاگەیاندووە کە تەرمەکەی لای دامودەزگا ئەمنییەکانە و ڕادەستیان ناکرێتەوە.

سێ ڕۆژ دوای کوژرانی عەلی ئوسلووب، وەزارەتی ئیتلاعاتی کۆماری ئیسلامیی ئێران لە ڕێکەوتی ٢٩ی خەرمانانی ١٤٠٥دا (٢٠ی اێپتامبەری ٢٠٢٦) بەیاننامەیەکی دەر کرد و بەبێ ئاماژەدان بە ناسنامەکەی، ئەم هاووڵاتییەی وەکوو «ئەندامی چالاک»ی حیزبێکی ئۆپۆزیسیۆنی کوردی لە قەڵەم دابوو. ڕاگەیاندنە دەوڵەتییەکانیش وێنەی تەرمەکەیان بڵاو کردووەتەوە.