تا ئێستا هیچ زانیارییەک لەسەر چارەنووسی دوو هاووڵاتیی کوردی خەڵکی سەردەشت بە ناوەکانی کاوە شەریفی و شوان شێخە کە لە ڕێکەوتی ٩ی پووشپەڕەوە لە لایەن دەزگای ئیتلاعاتی سپای پاسدارانەوە دەستبەسەر کراون، لە بەردەستدا نییە. ئەم دوو هاووڵاتییە کوردە لە ساتەوەختی دەستبەسەربوونەوە تا ئێستا مۆڵەتی دیدار و پێوەندیی تەلەفۆنی لەگەڵ بنەماڵەیان پێ نەدراوە.
سەرچاوەیەکی ئاگادار لە سەردەشتەوە سەبارەت بەم بابەتە بە تۆڕی مافەکانی مرۆڤی کوردستانی وت: «شوان شێخە، ئەندازیاری کۆمپەتەر و کاوە شەریفی لە ڕێکەوتی ٩ی پووشپەڕدا بە هۆکاری نادیار لە لایەن دەزگای ئیتلاعاتی سپای پاسدارانەوە دەستبەسەر کران. ئەم دوو کەسە دوای دەستبەسەرکردن ڕەوانەی دەستبەسەرگەیەکی ئەم دامەزراوە ئەمنی-نیزامییە کراون و تا ئێستا مۆڵەتی دیدار و پێوەندیی تەلەفۆنی لەگەڵ بنەماڵەیان پێ نەدراوە».
بە وتەی ئەم سەرچاوەیە، بنەماڵەی ئەم دوو کەسە سەردانی دەزگای ئیتلاعاتی سپایان کردووە و لەوێ دەستبەسەرکردنەکەیان پشتڕاست کراوەتەوە، بەڵام تا ئێستا هیچ زانیارییەکیان لەسەر تۆمەت و شوێنی ڕاگرتنیان نەخستۆتە بەردەست.