سێ هاووڵاتی کورد بە ناوەکانی کامران کەمانی، کەیوان مۆکەرەمی و حاتەم ئۆزدەمیر پاش چەندین هەفتە لە دەسبەسەرگەی ٨١ی رەمەزانی ئتیلاعاتی سپای پاسدارانەوە گۆاسترانەوە بۆ زیندانی ناوەندی ورمێ.
بە پێی ئەو زانیارییانەی دەست تۆڕی مافەکانی مرۆڤی کوردستان کەوتوون، کامران کەمانی و حاتەم ئۆزدەمیر رۆژی سێ شەمە ٢٨ی گەلاوێژ/2019.08.20 گۆاستراونەتەوە بۆ بەندی زیندانیانی سیاسی و هەروەها کەیوان مۆکەرەمیش گواستراوەتەوە بۆ بەندی ٣-٤، بەندی زیندانیانی ئاسایی.
کامران کەمانی و کەیوان موکەرەمی خەڵکی ئاوایی ئەنبەی سەر بە شاری ورمێ رۆژی ١٧ی پوشپەڕ/ 2019.07.13 وێڕای هاووڵاتییەکی دیکەی کورد بە ناوی سابیر کەمانی لە هەمان ئاوایی لەلایەن ئیتلاعاتی سپای پاسدارانەوە دەستبەسەر کران. سابیر کەمانیش رۆژی ٢٨ی گەلاوێژ گواسترایەوە بۆ زیندانی ناوەندی ورمێ.
حاتەم ئەزدەمیر، هاووڵاتی کوردی کوردستانی تورکیە (باکور)، رۆژی ١١ی پوشپەڕی ئەمساڵ/ 2019.07.02 پاش تێکهەڵچوونی هێزەکانی پارتی کرێکارانی کوردستان و هێزی قەرارگای “هەمزەی سەیدولشوهەدا”ی سپای پاسدارانی ورمێ لە ناوچەی سنووری چالدوران دەستبەسەر کرا.
دوترێ لەو تێکهەڵچوونەدا گولە هاوەنێکی (خۆمپارە) بەردەکەوێت و لە هۆش دەچێت. پاشان لەلایەن هێزەکانی کۆماری ئیسلامییەوە دەستبەسەر و رەوانەی دەستبەسەرگەی ئیتلاعاتی سپای پاسدارانی ورمێ دەکرێت.