تۆڕی مافه‌كانی مرۆڤی کوردستان

به‌گوێره‌ی زانیارییه‌كانی تۆڕی مافه‌كانی مرۆڤی كوردستان، سه‌رله‌به‌یانی ئه‌مڕۆ یه‌كشه‌ممه ‌٨ی پووشپه‌ڕ/٢٨ی ژوئن هێزه‌ئه‌منیه‌تییه‌كانی سه‌ربه‌ ئیداره‌ی ئیتلاعاتی سنه‌، هه‌ڵیانكوتایه‌سه‌ر ماڵی فه‌رانه‌ك جه‌مشیدی، ئه‌ندامی ئه‌نجومه‌نی سه‌وزی كوردستان، و ده‌ستبه‌سه‌ریان كردوه‌، بنه‌ماڵه‌ی خانمی جه‌مشیدی ڕایانگه‌یاند، كه‌سانی لیباس شه‌خسی، سه‌ره‌ڕای پشكنینی ماڵه‌كه‌یان، بڕێك‌كه‌ل و په‌لی ناوبراو وه‌ك كۆمپیته‌ر و مۆبایله‌كه‌شیان له‌گه‌ڵ خۆیان بردوه‌.
پێده‌چێ ئه‌م چالاكی ژینگه‌پارێزه‌، بۆ لێپرسینه‌وه‌ ڕه‌وانه‌ی ده‌ستبه‌سه‌رگه‌ی ئیداره‌ی ئیتلاعات كرابێ. فه‌رانك جه‌مشیدی پێشتریش له‌پاییزی ١٣٩٧له‌كاتی ده‌ستگیركردنە به‌ربڵاو و ده‌سته‌جه‌معییەکی چالاكانی ژینگه‌پارێز و ئه‌ندامانی لقی كوردستانی حیزبی وه‌حده‌تی میللیدا، ده‌ستبه‌سه‌ر و دواتریش بانگ كراوه‌و له‌سه‌ر چالاكییه‌كانی خۆی و هاوسه‌ره‌كه‌ی به‌ناوی «ئارمین ئیسپه‌رلوس»، كه‌له‌و كاته‌دا ده‌ستبه‌سه‌ر كرابوو، كه‌وتوه‌ته ‌ژێر لێپرسینه‌وه‌.
ده‌ستبه‌سه‌ركرانی خانمی جه‌مشیدی له‌حاڵێكدا ڕوویداوه‌كه‌ڕۆژی ڕابردوو «ئه‌فشین شێخه‌لئیسلامی »ش، چالاكی مه‌ده‌نی له‌لایه‌ن كاربه‌ده‌ستانی ئیداره‌ی ئیتلاعاتی سنه‌وه ‌ده‌ستبه‌سه‌ر كراوه‌. ناوبراو یه‌كێك له‌و چالاكوانانە بوو كه لە‌پاییزی ساڵی ١٣٩٧ بۆ ماوه‌ی مانگێك ده‌ستبه‌سه‌ر كرا.