سه‌رله‌به‌یانیی ڕۆژی ڕابردوو ژماره‌یه‌كی زۆر لە هێزه‌ ئه‌منییه‌كان كه لە نێو ‌چوار ئۆتۆمبیلدا بوون‌، گه‌مارۆی گوندی «داراب»ی ناوچه‌ی ڕێژاوی شاری داڵاهۆ له ‌پارێزگای كرماشانیان داوە و‌ سێ لاویان بە ناوەکانی ئاره‌ش دارابی ته‌مه‌ن ١٨ ساڵ، یه‌حیا سه‌یدمورادی ١٩ ساڵ و ئه‌فشین سه‌یدمورادی ته‌مه‌ن ٢٠ ساڵ ده‌ستبه‌سه‌ر كردووە.
سه‌رچاوه‌یه‌كی ئاگادار‌ به ‌تۆڕی مافه‌كانی مرۆڤی كوردستانی وت: «سه‌رله‌به‌یانیی ڕۆژی ڕابردوو ١٥ی گه‌لاوێژ، كاروانێكی هێزه‌ تایبه‌ته‌كان دوای گه‌مارۆدانی گوندی داراب و بێئه‌وه‌ی حوكمی یاساییان پێ بێت، سێ لاوی خه‌ڵكی ئه‌م گونده‌یان ده‌ستبه‌سه‌ر كرد. ئەوان به‌ گرتنەبەری میتۆدی ترساندن و تۆقاندن، له‌ كاتێكدا هەڵیانکوتاوەتە سەر ئە ماڵانە و ده‌ستیان داوەتە پشکنین و گه‌ڕانی ناو ماڵه‌كان کە خەڵکی هێشتا له ‌خه‌ودا بوون».
سه‌ره‌ڕای به‌دواداچوونی بنه‌ماڵه‌ی گیراوان، بەڵام تا ئێستا دیار نییە ئەم کەسانە لەلایەن کام دزگای ئەمنییەوە دەستبەسەرکراون و هیچ ڕوونکردنەوەیەکی لەسەر شوێنی ڕاگیران و هۆکاری ده‌ستبه‌سه‌ركردنی ئه‌م سێ هاووڵاتییه‌ كورده ڕانەگەیندراوە‌.