لە درێژەی شەپۆلی نوێی دەستبەسەرکردنی هاووڵاتیان و چالاکانی کورد لە مەهاباد و دەوروبەری، لە ڕۆژی ڕابردووەوە هێزەکانی دەزگای ئیتلاعاتی سوپای پاسداران لەم شارە و گوندی «بەیروم»دا بەبێ مۆڵەتی یاسایی قادر خەرامانفەر، کەمال مەسعوودی، جەلال سەدەفی، سیامەند سەیدئەحمەدی، زانیار سەیدئەحمەدی، ئارام مەبزووله و یووسف قاڵیان دەستبەسەر کردووە.
بەپێی ئەو زانیاریانەی بە تۆڕی مافەکانی مرۆڤی کوردستان گەیشتووە، شەوی ڕابردوو ٢٤ی سەرماوەزی ١٤٠٣ (١٤ی دیسامبەری ٢٠٢٤) هێزەکانی دەزگای ئیتلاعاتی سوپای پاسداران لە گوندی «بەیروم» هەڵیانکوتاوەتە سەر ماڵەکانی ٤ هاووڵاتی و چالاکی کورد بە ناوەکانی سیامەند سەیدئەحمەدی، زانیار سەیدئەحمەدی، ئارام مەبزووله و یووسف قاڵ و بەبێ مۆڵەتی یاسایی هەموو ئەم هاووڵاتیانەیان دەستبەسەر کردووە. لەم نێوانەدا تەنها سیامەند سەیدئەحمەدی دوای چەند کاتژمێرێک دەستبەسەربوون ئازاد کراوە.
ئەم هێزانە هاوکات ڕۆژی یەکشەممە ٢٥ی سەرماوەزی ١٤٠٣ (١٥ی دیسامبەری ٢٠٢٤) هەڵیانکوتاوەتە سەر ماڵەکانی قادر خەرامانفەر، کەمال مەسعوودی و جەلال سەدەفی لە شاری مەهاباد و دوای پشکنینی ماڵەکان و دەستگرتن بەسەر هەندێ کەلوپەلی کەسیی بنەماڵەکانیاندا، ئەم سێ هاووڵاتییەیان دەستبەسەر کردووە.
دەوترێت ئەم هاووڵاتیانە دوای دەستبەسەرکران ڕەوانەی دەستبەسەرگەی دەزگای ئیتلاعاتی سوپای پاسداران لە ورمێ کراون.
