دوای تێپەڕینی دوو ڕۆژ لە دەستبەسەرکردنی ئارەزوو جەلیلزادە، مامۆستای خەڵکی سەردەشت، تا ئێستا هیچ زانیارییەک لەسەر چارەنووسی بەردەست نەکەوتووە.
بەپێی ئەو زانیاریانەی بە تۆڕی مافەکانی مرۆڤی کوردستان گەیشتووە، ئەم مامۆستا کوردە ڕۆژی ١٣ی ڕەشەمەی ١٤٠٣ (٣ی مارسی ٢٠٢٥) لە ماڵەکەی خۆی لە شاری سەردەشت لە لایەن هێزە ئەمنییەکانەوە بەبێ مۆڵەتی یاسایی دەستبەسەر کراوە.
ئەم هاووڵاتییە لە کاتی دەستبەسەرکرانەوە تا ئێستا لە مافی دیداری بنەماڵە و وەرگرتنی پارێزەر بێبەش بووە. هاوکات ئەگەرچی بنەماڵەکەی بۆ وەرگرتنی زانیارییەک لەسەر چارەنووسی بەدواداچوونی زۆریان کردووە، بەڵام دامودەزگا ئەمنی و دادوەرییەکان ئامادە نەبوون هیچ ڕوونکردنەوەیەک بە بنەماڵەکەی بدەن.
