دەستبەسەرکردنی مامۆستا بەرزان مەلێکی دوای بانگهێشتکران لە لایەن دادگای تایبەتی مامۆستایانی ئایینیی هەمەدانەوە

مامۆستا بەرزان مەلێکی، بەرنوێژ و وانەبێژی مزگەوتی جامیعی «شێخەین»ی سنە، دوای بانگهێشتکران بۆ دادگای تایبەتی مامۆستایانی ئایینیی هەمەدان دەستبەسەر کرا.

بەپێی ئەو زانیاریانەی بە تۆڕی مافەکانی مرۆڤی کوردستان گەیشتووە، ئەم مامۆستا ئایینییە کوردە ڕۆژی یەکشەممە ٤ی جۆزەردانی ١٤٠٤ (٢٥ی مەیی ٢٠٢٥) بانگهێشتی بەردەم بنکەی هەواڵگریی ئیدارەی ئیتلاعاتی سنە کراوە و بۆ ماوەی ٢ کاتژمێر لێپرسینەوەی لێ کراوە. هاوکات بانگهێشتنامەیەکیشی بۆ نێردرابوو و داوای لێ کرابوو سەردانی دادگای تایبەتی مامۆستایانی ئایینیی هەمەدان بکات.

مامۆستا بەرزان مەلێکی ڕۆژی دووشەممە ٥ی جۆزەردانی ١٤٠٤ (٢٦ی مەیی ٢٠٢٥) دوای ئەوەی سەردانی دادگای تایبەتی مامۆستایانی ئایینیی هەمەدانی کردووە دەستبەسەر کراوە و بە بڕیاری بارمتەی یەک میلیارد تمەنییەوە گوازراوەتەوە بۆ دەستبەسەرگەیەکی ئەم شارە.

پێشتر و لە ڕێکەوتی ٨ی ڕێبەندانی ١٤٠٣دا (٢٧ی ژانڤییەی ٢٠٢٥) هێزە ئەمنییەکان دوای داخستنی جادەی سنە بۆ دێولان، مامۆستا بەرزان مەلێکی و ژمارەیەک فەقێی مزگەوتی جامیعی «شێخەین»ی سنە کە بەرەو زاهیدان دەچوون، بۆ ماوەی چەند کاتژمێرێک دەستبەسەر کرد و ڕێگەیان نەدا درێژە بە سەفەرەکەیان بۆ زاهیدان بدەن.