دوای تێپەڕینی چوار ڕۆژ لە دەستبەسەرکردنی عومەر محەممەدی، شاعیر و نووسەری خەڵکی شنۆ، تا ئێستا هیچ زانیارییەک لەسەر چارەنووسی بەردەست نەکەوتووە.
بەپێی ئەو زانیاریانەی بە تۆڕی مافەکانی مرۆڤی کوردستان گەیشتووە، ڕۆژی هەینی ٣٠ی جۆزەردانی ١٤٠٤ (٢٠ی ژوەنی ٢٠٢٥) هێزە ئەمنییەکان هەڵیانکوتاوەتە سەر ماڵی ئەم نووسەرە کوردە لە شاری شنۆ و دوای دەستبەسەرکردنی گواستوویانەتەوە بۆ دەستبەسەرگەیەکی ئەمنی لە شاری ورمێ.
سەرەڕای سەردانکردن و بەدواداچوونی بنەماڵەی عومەر محەممەدی بۆ وەرگرتنی زانیارییەک لەسەر چارەنووسی، دامودزگا ئەمنی و دادوەرییەکان ئامادە نەبوون هیچ ڕوونکردنەوەک سەبارەت بە بارودۆخی ئەم نووسەرە بە بنەماڵەکەی بدەن.
