ژماره‌یه‌ك له‌ هاووڵاتییانی گونده‌كانی نزیك چیای چلچه‌مه‌ی دیوانده‌ره‌ له‌ وتووێژه‌كدا له‌گه‌ڵ تۆڕی مافه‌كانی مرۆڤی كوردستان ڕایانگه‌یاند كه‌ سپای پاسداران به‌ بیانووی دروستكردنی پایه‌گای سەربازیی تازه‌،‌ خه‌ریكی تێكدان و شێواندنی ناوچه‌ کوێستانییه‌كانە.
به‌ وته‌ی ئه‌م سه‌رچاوانه‌، هێزه‌كانی سپا له‌ دوو لوتكه‌ی «سوڵتان» و «دووبرا»ی زه‌نجیره‌چیای چلچه‌مه‌ی دیوانده‌ره،‌‌ دروستكردنی ڕێگا و پایه‌گای سەربازییان دەست پێ کردووە، دیارە ئه‌م کارە مەترسیی تێكچوونی ئێكۆسیسته‌می پڕبایەخی ئه‌م ناوچه‌یه‌ و بنبڕبوونی سەرچاوە سروشتییەکانی لەگەڵدایە.
ئه‌م سه‌رچاوانه‌ له‌ درێژه‌دا ئەوەشیان ڕاگه‌یاند کە هێزه‌كانی سپا خه‌ریكی هه‌ڵكه‌ندنی تونێل و دروستكردنی سوولەی گەورەن له‌ نێو چیاكاندا‌ و دەنگۆی ئەوە هەیە کە سپا دەیهەوێت لەم ناوچەیەدا سایتی مووشەکی دروست بکات.
له‌ مانگی گوڵانی ئه‌مساڵدا دوای ئەوەی شەڕێک لە نێوان سپای پاسداران و یه‌كێك له‌ حیزبه‌ كوردییه‌كاندا ڕووی دا، سپای پاسداران بۆ چه‌ند حه‌فته‌ ده‌ستی دایه‌ گه‌مارۆدانی ئه‌م ناوچه‌یە و تۆپبارانكردنی به‌رزاییه‌كانی سوڵتان و دووبرا.
به‌ درێژایی چه‌ند ساڵی ڕابردوو تۆڕی مافه‌كانی مرۆڤی کوردستان ڕاپۆرتی بەڵگەداری له‌سه‌ر تێكدانی به‌ربڵاوی ناوچه‌ پارێزراوه‌كانی شاهۆ و كۆساڵان له‌ پارێزگاكانی كرماشان و كوردستان بە دەستی سپای پاسدارانی ئێران‌ بڵاو كردۆتەوە‌.