به‌پێی زانیارییه‌كانی تۆڕی مافه‌كانی مرۆڤی كوردستان، سه‌رله‌به‌یانیی ئه‌مڕۆ سێشه‌ممه‌ ٢١ی گه‌لاوێژ، حوكمی له‌سێداره‌دانی به‌ندكراوێك به ‌ناوی فایه‌ق ئه‌حمه‌دی دوای تێپەڕینی ١٣ ساڵ بە سەر زیندانیبوونیدا، له‌ به‌ندیخانه‌ی ناوه‌ندیی سنه‌ به‌ڕێوه‌ چوو.
ئه‌م به‌ندكراوه‌ له‌ ڕۆژانی ڕابردوودا بۆ به‌ڕێوه‌چوونی حوكمه‌كه‌ی ڕه‌وانه‌ی ژووری تاكه‌كه‌سی كرابوو. ناوبراو ٣٩ساڵ ته‌مه‌نی بوو و ساڵی ١٣٨٦ به ‌تۆمه‌تی كوشتنی یه‌كێك له‌ هاوڕێكانی خۆی له‌ شه‌ڕێكی به‌كۆمه‌ڵدا، ده‌ستبه‌سه‌ر و بە بڕیاری دادگا‌ سزای قه‌ساسی بۆ ده‌رچوو.
ڕۆژی ڕابردوویش حوكمی ئێعدامی به‌ندكراوێكی‌تر به ‌ناوی كه‌یوان ڕه‌زاقولی كه‌ ئەویش سزای قه‌ساسی بۆ ده‌رچووبوو، له‌م زیندانه‌دا به‌ڕێوه‌ چوو.