بەپێی زانیارییەکانی تۆڕی مافەکانی مرۆڤی کوردستان، سەرلەبەیانیی ئەمڕۆ خزر قەوی‌دڵ، زیندانیی مەحکووم بە ئێعدام، بە مەبەستی جێبەجێکردنی حوکمەکەی لە بەندی ٦ (بەندی ١٥ی پێشوو)ی زیندانی ناوەندیی ورمێوە گواسترایەوە بۆ ژووری تاکەکەسی.
ناوبراو نزیکەی ٧ ساڵ لەمەوبەر بە تۆمەتی پێوەندیدار بە مادە هۆشبەرەکانەوە دەستبەسەر کرا و حوکمی لەسێدارەدانی بۆ دەرچوو. ئەم بەندکراوە لە ناوەڕاستی خاکەلێوەی ئەمساڵ و دوابەدوای کەوتنەوەی شەپۆلێکی بەربڵاوی ناڕەزایەتیی زیندانییان لە زیندانەکانی ئێراندا، لەگەڵ چەند بەندکراوی دیکەدا بۆ ماوەی مانگێک گوازرابوویەوە بۆ دەستبەسەرگەی ڕێکخراوی ئیتلاعاتی سپا و ئیدارەی ئیتلاعاتی ورمێ.
شیمانەی ئەوە دەکرێت ژمارەی ئەو زیندانییانەی بۆ جێبەجێکردنی حوکمی لەسێدارەدان دەگوێزرێنەوە بۆ ژووری تاکەکەسی، ڕوو لە زیادبوون بکات.