سزای لەسێدارەدانی سەلاح ڕەحیمی، بەندکراوی خەڵکی گوندی «مەلەکشان»ی سنە کە پێشتر بە تۆمەتی پێوەندیدار بە «مادە هۆشبەرەکان»ـەوە سزای لەسێدارەدانی بۆ دەرچوبوو، لە زیندانی ناوەندیی یەزد جێبەجێ کرا.
بەپێی ئەو زانیاریانەی بە تۆڕی مافەکانی مرۆڤی کوردستان گەیشتووە، ئەم بەندکراوە ڕۆژی هەینی ٢٣ی سەرماوەزی ١٤٠٣ (١٣ی دیسامبەری ٢٠٢٤) بە مەبەستی جێبەجێکردنی سزاکە ڕەوانەی ژووری تاکەکەسیی زیندانی ناوەندیی یەزد کرابوو و بەرەبەیانی ڕۆژی یەکشەممە ٢٥ی سەرماوەز (١٥ی دیسامبەر) هەر لەم زیندانەدا لە سێدارە دراوە.
سەلاح ڕەحیمی، ٣٩ ساڵان و باوکی سێ منداڵ، چەند ساڵێک لەمەوپێش بە تۆمەتی پێوەندیدار بە «مادە هۆشبەرەکان»ـەوە دەستبەسەر کرابوو و سزای لەسێدارەدانی بۆ دەرچوبوو.
