سزای لەسێدارەدانی ئەشکان کازمی، محەممەد شەهیدی و مزەفەر شاسواری، سێ بەندکراوی خەڵکی گیەڵان و کرماشان کە پێشتر بە تۆمەتی «کوشتنی بەئەنقەست» سزای قەساسی نەفس (لەسێدارەدان)یان بۆ دەرچووبوو، لە زیندانی دیزڵئاوای کرماشان جێبەجێ کرا.
بەپێی ئەو زانیاریانەی بە تۆڕی مافەکانی مرۆڤی کوردستان گەیشتووە، ئەم سێ بەندکراوە بەرەبەیانی ڕۆژی سێشەممە ١٨ی بەفرانباری ١٤٠٣ (٧ی ژانڤییەی ٢٠٢٥) لە زیندانی دیزڵئاوای کرماشان لە سێدارە دراون.
ئەشکان کازمی، خەڵکی گوندی «کازمخانی سەروو»ی ناوچەی گواوەری گیەڵان، هەروەها محەممەد شەهیدی و مزەفەر شاسواری، خەڵکی شاری کرماشان، نزیکەی ٤ ساڵ لەمەوپێش لە سێ دۆسیەی جیاوازدا بە تۆمەتی «کوشتنی بەئەنقەست» دەستبەسەر کرابوون و سزای قەساسی نەفس (لەسێدارەدان)یان بۆ دەرچووبوو.
