پێنج بەندکراوی سزادراو بە لەسێدارەدان بە ناوەکانی ئەیوب ئەسەدی، حامید نەزەریانی، ئەمیر نەزەریانی، ئەمین تەیمووری و سەیدئیمان حەیدەری کە پێشتر بە تۆمەتی پێوەندیدار بە «مادە هۆشبەرەکان»ـەوە ئەو سزایەیان بۆ دەر چووبوو، بە مەبەستی جێبەجێکردنی سزاکانیان ڕەوانەی ژووری تاکەکەسیی زیندانی قزلحەساری کەرەج کران. هاوکات لەگەڵ گواستەوەی ئەم بەندکراوانەدا، سەدان بەندکراوی بەندی ٢ی زیندانەکە مانیان لە خواردن گرتووە.
بەپێی زانیارییەکانی تۆڕی مافەکانی مرۆڤی کوردستان، نیوەڕۆی دووشەممە ٢٢ی پووشپەڕی ١٤٠٥ (١٣ی جولایی ٢٠٢٦) لانیکەم ٥ بەندکراوی سزادراو بە لەسێدارەدان بە مەبەستی جێبەجێکردنی سزا لە بەندی ٢ی زیندانی قزلحەساری کەرەجەوە ڕەوانەی ژووری تاکەکەسی کراون.
ناسنامەی بەندکراوەکان بەم جۆرە ڕاگەیەنراوە: سەیدئیمان حەیدەری، خەڵکی تاران، ئەیوب ئەسەدی، خەڵکی هەرسینی کرماشان، وەحید تەیمووری، حامید نەزەریانی و ئەمیر نەزەریانی، خەڵکی نوورئاباد و کووهدەشتی لوڕستان.
دوابەدوای گواستەوەی ئەم کەسانە، بەندکراوانی بەندی ٢ی زیندانەکە وەکوو ناڕەزایەتییەک لە بەرانبەر شەپۆلی لەسێدارەداندا، مانیان لە خواردن گرتووە.
