عەلی سەعیدی هاووڵاتی کورد پاش دوو هەفتە لێپێچینەوە لە دەستبەسەرگەی ئیدارەی ئیتلاعاتی شاری ورمێ، بۆ زیندانی ناوەندی ئەو شارە گواسترایەوە.
بە پێی زانیارییەکانی تۆڕی مافەکانی مرۆڤی کوردستان، ئەم هاووڵاتییەی خەڵکی ئاوایی حوسەینیەی ناوچەی سۆمای برادۆستی ورمێ، رۆژی ٢٠ گەلاوێژی ١٣٩٨ی هەتاوی/ ٢٠١٩.٠٨.١١ لەلایەن هێزە ئەمنییەکانەوە دەستبەسەر کرا و پاش دوو هەفتە لێپێچینەوە لە ئیدارەی ئیتلاعاتی ورمێ، بۆ زیندانی ناوەندیی هەمان شار گواسترایەوە.
تۆمەتی ئەم هاووڵاتییە کوردە هاوکاری لەگەڵ یەکێک لە حیزبە كوردییه‌كان دژبه‌ری كۆماری ئێسلامی ئێران راگەێنراوە.
عەلی سەعیدی ئێستا لە بەندی ٣-٤ لەگەڵ زیندانیانی ئاساییدا بەند کراوە.
بە پێی ئەو ئامارانەی لەلایەن تۆڕی مافەکانی مرۆڤی کوردستان بڵاو كراوه‌ته‌وه‌، تەنیا لە مانگی گەلاوێژی ئەمساڵدا لانیکەم ٢٣ هاووڵاتی و چالاکی کورد لەلایەن هێزەکانی ئیدارەی ئیتلاعات و ئیتلاعاتی سپای پاسدارانەوە لە شارەکانی مەریوان، کامیاران، سنە، دیواندەرە، تاران، سەرپێڵی زەهاو و ورمێ… دەستبەسەر کراون.