به‌پێی زانیارییه‌كانی تۆڕی مافه‌كانی مرۆڤی كوردستان، ڕۆژی ١٠ی ڕه‌زبه‌ر، دوابەدوای سکاڵای شارەوانی پێشووی شاری سەقزەوە، پێنج چالاكی ڕاگەیاندنکاری ئەم شارە بانگهێشتی بەردەم دادگا كراون.
فه‌ردین موسته‌فایی، به‌ڕێوه‌به‌ری كاناڵی «سه‌قز ڕووداو»، كه‌یوان جه‌لالی به‌ڕێوه‌به‌ر و زاهێد شه‌ریفپوور سه‌رنووسەری كاناڵی «واکاوی»، هیوا مه‌جیدی به‌ڕێوه‌به‌ری كاناڵی «ساکاپرێس» و موسته‌فا حه‌مدی به‌ڕێوه‌به‌ری گرووپی «پرسمان»ی سه‌قز بانگهێشتی بەردەم لقی یه‌كی لێپرسینەوەی دادسەرای گشتی و ئینقلابی سه‌قز كراون و تۆمه‌تەکانیان پێ ڕاگەیەنرا. بە وتەی دادوەری لێپرسینەوە، ئه‌م كه‌سانه تۆمەتی «بڵاوكردنه‌وه‌ی هەواڵی درۆ»یان ڕووبەڕوو کراوەتەوە.
هۆکاری ڕووبەڕووکردنەوەی ئه‌م تۆمه‌ته‌ دەگەڕێتەوە بۆ بڵاوبوونه‌وه‌ی هه‌واڵێك لەسەر گەندەڵیی ماڵیی شۆرای شار و شاره‌وانی پێشووی سه‌قز، ده‌وترێ ئه‌م پێنج چالاكه‌ ڕاگەیاندنکارە له‌ ڕۆژانی داهاتوودا دادگایی دەکرێن.