به‌پێی زانیارییه‌كانی تۆڕی مافه‌كانی مرۆڤی كوردستان، سێ چالاكی مه‌زهه‌بیی خه‌ڵكی بۆكان به ‌ناوه‌كانی مامۆستا فایه‌ق شه‌ریعه‌ت‌په‌نا، تایه‌ر شێخی و ئامانج حه‌مزه‌زاده،‌ دوای زیاتر لە ٤٠ ڕۆژ ڕاگیران له‌ ده‌ستبه‌سه‌رگه‌ی ئیداره‌ی ئیتلاعاتی ورمێ، گوێزرانه‌وه‌ بۆ زیندانی ئه‌م شاره‌. ڕۆژی یه‌كشه‌ممه‌ ٢٣ی خه‌رمانان ئه‌م كه‌سانه‌ ڕه‌وانه‌ی قه‌ره‌نینه‌ی زیندان كراون و ئەمڕۆ دوای چوار ڕۆژ گوێزرانه‌وه‌ بۆ به‌ندی زیندانییانی سیاسی و مه‌زهه‌بی.
سه‌رچاوه‌یه‌كی ئاگادار له‌ وتووێژێكدا له‌گه‌ڵ تۆڕی مافه‌كانی مرۆڤی كوردستان ڕایگەیاند کە «ئه‌ندامبوون له‌ گرووپی ئه‌نسارولئیسلامدا» وەک تۆمەتی ئەم کەسانە دەستنیشان کراوە، هەروەها وتی مامۆستا فایق شه‌ریعه‌ت‌په‌نا، ئیمام جومعه‌ی گوندی ئه‌میرئاوای بۆكانه‌، تایه‌ر شێخی مامۆستای قوتابخانه‌یه‌ و ئامانج حه‌مزه‌زاده‌یش فه‌قێی ئایینییه‌.
تۆڕی مافه‌كانی مرۆڤی كوردستان حه‌فته‌ی ڕابردوو لە ڕاپۆرتێكدا ڕایگەیاند کە لە یەک مانگی ڕابردودا لانیكه‌م ١٢ چالاكی مه‌زهه‌بی له‌ بۆكان دەستبەسەر کراون.