بە هۆی تەقەی هێزە چەکدارەکانی کۆماری ئیسلامیەوە لە رۆژی ٣١ی خەرمانان/ 09,22، کۆڵبەرێک بە ناوی شەفیع ئەحمەدی خەڵکی ئاوایی خانیک بریندار بوو.
بە پێی ئەو ئامارانەی لەلایەن تۆڕی مافەکانی مرۆڤی کوردستان کۆکراونەتەوە، تەنیا لە مانگی خەرماناندا بە هۆی تەقەی هێزە چەکدارەکانی تورکیە و ئێرانەوە لانیکەم پێنج کۆڵبەر و کاسبکاری کورد کوژراون و ١١ی دیکەش بریندار بوون. هەروەها کۆڵبەرێکیش بە هۆی رووداوی ئۆتۆمبێڵەوە لە کاتی پیشەی کۆڵبەریدا بریندار بووە.
بە پێی ئامارێکی رەسمی کە لەلایەن ناوەندی ئاماری ئێرانەوە بڵاوبۆتەوە، ڕۆژهه‌ڵاتی کوردستان خاوەنی زۆرترین رێژەی بێکاری و هەڵاوسانە لە ئێراندا. هەر بۆیەش خەڵکی ناوچە سنوورییەکان بۆ بژێوی ژیانیان روو لە پیشەی کۆڵبەری و کاسبکاری دەکەن و ساڵانەش بەم هۆیەوە دەیان کۆڵبەر و کاسبکاری کورد بە بیانوی ئەوەیکە کاڵای نایاسایی دەگوازنەوە دەکەونە بەر هێرشی هێزە چەکدارەکانی ئێران و دەکوژرێن و بریندار دەبن.