له‌ ڕۆژانی ڕابردوودا دوو كۆڵبه‌ر و كاسبكاری كورد به‌ ناوه‌كانی سوهه‌یب فێردەوسی و مێهدی‌ ره‌سووڵزاده،‌ به‌ ته‌قه‌ی هێزه‌ سنوورپارێزەکانی ناوچه‌ سنوورییەکانی نه‌وسوود و سه‌رده‌شت له پارێزگاكانی كرماشان و ئازه‌ربایجانی ڕۆژئاوا، بریندار بوون.
به‌ پێی زانیارییه‌كانی تۆری مافه‌كانی مرۆڤی كوردستان، شه‌وی ڕابردوو ٨ی ڕه‌زبه‌ر، كاسبكارێك به‌ ناوی مێهدی ڕه‌سووڵزاده،‌ خه‌ڵكی گوندی «بۆبانه»ی سه‌رده‌شت، به‌ ته‌قه‌ی هێزه‌كانی پاسه‌وانی سنووری نۆكان بریندار بووە.
هه‌وه‌ها به‌پێی ڕاپۆرتێكی‌تر کە بە دەستی تۆری مافه‌كانی مرۆڤی كوردستان گه‌یشتووه‌. ڕۆژی هه‌ینی ٤ی ڕه‌زبه‌ر، دەستەکانی كۆڵبه‌رێكی خه‌ڵكی گوندی «دزاوەر»ی سه‌ر به‌ نه‌وسوود بە ناوی سوهه‌یب فێردەوسی به‌ ته‌قه‌ی هێزه‌كانی پاسەوانی سنوور بریندار بووه‌.
به‌پێی ئاماری كۆكراوه‌ له‌ لایه‌ن تۆڕی مافه‌كانی مرۆڤی كوردستانەوە، له‌ سه‌ره‌تای مانگی ڕه‌زبه‌ره‌وه‌ تا هه‌نووكه‌ لانیكه‌م ٤ كۆڵبه‌ر و كاسبكاری كورد به‌ ته‌قه‌ی هێزه‌كانی پاسەوانی سنووری ئێران له‌ ناوچه‌ سنوورییەکانی سه‌رده‌شت، نه‌وسوود و بانه‌ بریندار بوون.