به‌پێی ئەو زانیارییانەی به‌ تۆڕی مافەکانی مرۆڤی كوردستان گه‌یشتووه‌، ته‌حسین دادڕه‌سی هاووڵاتیی به‌ندكراوی مه‌ریوانی كه‌ زیاتر له‌ نیوه‌ی حوكمه‌كه‌ی تێپه‌ڕاندوه،‌ لە بەر دژایه‌تی و ڕێگەپێنەدانی ئیداره‌ی ئیتڵاعاتی مه‌ریوان،‌ له‌ مافە یاساییەکانی وەک مورەخەسی و هه‌روه‌ها ئازادیی مه‌رجدار بێبه‌ش كراوه‌.
ئه‌م هاووڵاتییه‌ خه‌ڵكی گوندی “سه‌ردۆش”ی مه‌ریوانه‌ كه‌ له‌ ڕێکەوتی ٨ی سه‌رماوه‌زی ١٣٩٦ی هه‌تاویدا له‌ لایه‌ن هێزه‌ ئیتڵاعاتەوە ده‌ستبه‌سه‌ر ‌و ڕه‌وانه‌ی دەستبەسەرگەی ئیداره‌ی ئیتڵاعاتی سنه‌ كراوه.‌ ناوبراو ماوه‌ی ٥ مانگ له‌ ژێر ئه‌شكه‌نجه ‌و گوشارێکی فراواندا و به‌ تۆمه‌تی پڕوپاگه‌نده‌ دژ به‌ حکوومەت و هاوكاری له‌گه‌ڵ حیزبی دیموكراتی كوردستانی ئیراندا (حدكا)، کەوتە ژێر لێپرسینه‌وەی چڕوپڕەوە، پاشان گواسترایه‌وه‌ بۆ به‌ندیخانه‌ی مه‌ریوان و له‌ خه‌رمانانی ١٣٩٧دا به‌ دانانی بارمته‌ و بە شێوەی کاتی ئازاد كرا.
ته‌حسین دادڕه‌سی له‌ مانگی گوڵانی ساڵی ١٣٩٧دا و دوای دادگاییکران لە دادگای ئینقلابی مەریواندا سزای ٦ ساڵ زیندانی به‌سه‌ردا سه‌پا و ئه‌م حوكمه‌ له‌ دادگای پێداچوونه‌وه‌دا په‌سه‌ند كرا. ناوبراو له‌ بەرواری ٦ی گه‌ڵاڕێزانی ١٣٩٧دا بە مەبەستی جێبەجێکردنی‌ حوكمه‌كه‌ی ڕه‌وانه‌ی به‌ندیخانه‌ی مه‌ریوان كرا و له‌ بەرواری ١٤ی خاكه‌لێوه‌ی ئه‌مساڵدا به‌ هۆکاری نادیار بۆ به‌ندیخانه‌ی سنه‌ گواستراوەتەوە.