له‌ درێژه‌ی ئەو شه‌ڕ و ئاژاوه‌ی نێوان به‌ندكراونی بەندیخانەی ورمێ كه‌ شه‌وی ڕابردوو له‌ به‌ندی ۱-۲ ده‌ستی پێ كردبوو، سه‌رله‌به‌یانیی دوێنی جارێكی‌تر گرژی و تێكهه‌ڵچوون له‌ نێوان به‌ندكراواندا هاته‌ ئاراوه‌ و دەوترێت ئەو بەندە لە بارودۆخێکی‌ ئاڵۆزدایە.
به‌پێی زانیارییه‌كانی تۆڕی مافه‌كانی مرۆڤی كوردستان، بەردەوامبوونی تێكهه‌ڵچوونه‌كانی به‌ندی ۱-۲بۆتە هۆی گەمارۆدرانی دووبارەی ئەو بەندە لە لایەن گاردی بەندیخانەوە و داوایان کردووە لانیكه‌م ده‌ به‌ندكراو ڕەوانەی ژووری تاكه‌كه‌سی بكرێن‌، به‌ڵام ئه‌م به‌ندكراوانه تا ئێستا ئامادە نەبوون مل بەو داوکارییە بدەن و نەچوونەتە‌ ‌ژووری تاكه‌كه‌سییەوە.
سه‌رله‌به‌یانیی دوێنێ به‌ندكراوێك به ‌ناوی یاسین خه‌لیفه‌ به ‌هۆی قووڵی برین‌ و خوێن‌لەبەرچوونەوە له ‌نه‌خۆشخانه‌ی زیندانه‌وه‌ ڕه‌وانه‌ی نه‌خۆشخانه‌یه‌ك له ‌ده‌روه‌ی زیندان كراوه‌ و چه‌ند به‌ندكراوێكی‌تریش له‌ نه‌خۆشخانه‌ی زیندان خه‌وێنراون.
ده‌وترێ تێكهه‌ڵچوونی به‌ندكراوێكی نوێ له‌گه‌ڵ یه‌كێك له‌ به‌ندكراوانی دیكه‌دا بووه‌ته‌ هۆی تێكهه‌ڵچوونی به‌ربڵاو له‌م به‌نده‌دا و لانیكه‌م ١١ به‌ندكراو به‌ هۆی به‌ركه‌وتنی كه‌ره‌سته‌ی تیژه‌وه‌ بریندار بوون.