پازدە چالاکوانی پیشەیی مامۆستایان بە ناوەکانی فاتمه زەندکەریمی، نەسرین کەریمی، موختار ئەسەدی، محەممەدڕەزا مورادی، سەلاحەدین حاجی‌میرزایی، بێهزاد قەوامی، سەیدغیاس نیعمەتی، ڕەزا تەهماسبی، ڕزگار حەیدەری، کووروش عیزەتیی ئەمینی، شەهریار نادری، ئارام ئیبراهیمی، سادق کەنعانی، مەجید کەریمی و فەیسەڵ نووری بە تۆمەتی «تێکدانی ئارامی و ئاسایشی گشتی» بانگهێشتی بەردەم لقی ١٠٩ی دادگای کەیفەریی دووی سنە کران.
بەپێی ئەو زانیاریانەی بە تۆڕی مافەکانی مرۆڤی کوردستان گەیشتووە، ئەم چالاکوانانە ڕۆژی ١١ی جۆزەردانی ١٤٠٤ (١ی ژوەنی ٢٠٢٥) بانگهێشتنامەیەکیان بە دەست گەیشتووە و پێیان ڕاگەیەنراوە کە دەبێ ڕۆژی ١٩ی جۆزەردان (٩ی ژوەن) سەردانی لقی ١٠٩ی دادگای کەیفەریی دووی سنە بکەن.
دەوترێت هۆکاری دۆسیەسازی و بانگهێشتکردنی ئەم هاووڵاتیانە دەگەڕێتەوە بۆ تۆمارکردنی سکاڵایەک لە لایەن داواکاریی گشتیی سنەوە لەسەر گردبوونەوەی ناڕەزاییانەی مامۆستایان لە بەردەم ئیدارەی پەروەردە و فێرکاریی سنە لە جۆزەردانی ١٤٠١دا (ژوەنی ٢٠٢٢).
