لە ڕۆژانی ڕابردوودا دوو منداڵی خوڵکی گوندی “سلێن”ی هەورامان بە ناوەکانی هێمن و کەیۆمەرس ئەدوایی لە لایەن هێزەکانی ئیتلاعاتی سپاوە دەستبەسەر کراون و گواستراونەوە بۆ دەستبەسەرگەی شەهرامفەڕی سپا لە شاری سنە.
سەرچاوەیەکی نزیک لە بنەماڵەی ئەم دوو منداڵە بە تۆڕی مافەکانی مرۆڤی کوردستانی ڕاگەیاند: «ڕۆژی ٢٧ی پووشپەڕ ئەم دوو منداڵە قوتابییەی خەڵکی سلێنی هەورامان دوای بانگهێشتکردن بۆ ئیتلاعاتی سپای شارەکانی مەریوان و سەوڵاوا، دەستبەسەر کراون و گواستراونەتەوە بۆ دەستبەسەرگەی شەهرامفەڕی سپا لە شاری سنە».
بە وتەی ئەم سەرچاوەیە، ئیتلاعاتی سپا ڕایگەیاندووە کە ئەم دوو منداڵەی بە تۆمەتی «هاوکاریکردنی یەکێک لە حیزبە ئۆپۆزیسیۆنە کوردییەکان» دەستگیر کردووە.
گوندی سلێن لە ناوچەی هەورامانی سەر بە شاری سەوڵاوا هەڵکەوتووە و هەموو ساڵ ئیدارەی ئیتلاعات و ڕێکخراوی ئیتلاعاتی سپا بە بیانووی ئەوەی هێزەکانی سەر بە حیزبە ئۆپۆزیسیۆنە کوردییەکان لەو ناوچە شاخاوییەدان، خەڵکی ئەو گوندە دەخەنە ژێر زەخت و گوشارەوە. لەم ساڵانەی ڕابردوودا زیاتر لە ٣٠ کەسی دانیشتووی ئەو گوندە هەر بەم بیانووەوە بانگهێشت، لێپرسینەوە و دەستبەسەر کراون.