چارەنووسی هێمن و کەیۆمەرس ئەدوایی، دوو منداڵی خەڵکی گوندی سلێنی هەورامان، کە لە ٢٧ی پووشپەڕەوە بە دەستی هێزە ئەمنییەکان دەستبەسەر کراون، هێشتا هەر نادیارە و هیچ زانیارییەک لەسەریان بەردەست نەکەوتووە.
سەرچاوەیەکی ئاگادار و نزیک لە بنەماڵەی ئەم دوو منداڵە دەستبەسەرکراوە بە تۆڕی مافەکانی مرۆڤی کوردستانی وت: «دوای ئەوەی بنەماڵەی ناوبراوان لە ڕۆژانی ڕابردوودا چەندین جار سەردانی دەزگا ئەمنییەکانی مەریوان و سنەیان کردووە، دواجار ئاگادار کراونەتەوە کە منداڵەکانیان بە مەبەستی لێپرسینەوە گواستراونەتەوە بۆ یەک لە دەستبەسەرگەکانی ئیدارەی ئیتلاعاتی سنە».
بە وتەی ئەم سەرچاوەیە، لەم ڕۆژانەی دواییدا لێپرسەوە ئەمنیەتییەکان بە بنەماڵەی ئەدواییەکانیان ڕاگەیاندبوو کە ڕەوتی لێپرسینەوەی منداڵەکانیان کۆتایی هاتووە و ئازاد دەکرێن، کەچی تا ئێستا ئازاد نەکراون.
به‌پێی‌ زانیارییه‌كانی تۆڕی مافه‌كانی مرۆڤی كوردستان، ڕۆژی ٢٧ی پووشپەڕ ئەم دوو منداڵە قوتابییە ١٦ و ١٧ ساڵەی خەڵکی سلێنی هەورامان، دوای بانگهێشتکردن بۆ ئیتلاعاتی سپای شارەکانی مەریوان و سەوڵاوا، دەستبەسەر کراون و گواستراونەتەوە بۆ دەستبەسەرگەی ئیدارەی ئیتلاعات لە شاری سنە.
بە وتەی ئەم سەرچاوەیە، ئیتلاعاتی سپا ڕایگەیاندووە کە ئەم دوو منداڵەی بە تۆمەتی «هاوکاریکردنی یەکێک لە حیزبە ئۆپۆزیسیۆنە کوردییەکان» دەستگیر کردووە.
گوندی سلێن لە ناوچەی هەورامانی سەر بە شاری سەوڵاوا هەڵکەوتووە و هەموو ساڵ ئیدارەی ئیتلاعات و ڕێکخراوی ئیتلاعاتی سپا بە بیانووی ئەوەی هێزەکانی سەر بە حیزبە ئۆپۆزیسیۆنە کوردییەکان لەو ناوچە شاخاوییەدان، خەڵکی ئەو گوندە دەخەنە ژێر زەخت و گوشارەوە. لەم ساڵانەی ڕابردوودا زیاتر لە ٣٠ کەسی دانیشتووی ئەو گوندە هەر بەم بیانووەوە بانگهێشت، لێپرسینەوە و دەستبەسەر کراون.