کۆماری ئیسلامیی ئێران دوای مردنی ئیبراهیم ڕەییسی، سەرکۆماری پێشووی ئێران و لە ئەندامانی «لیژنەی مەرگ» بۆ بەکۆمەڵکوشتنی زیندانیانی سیاسی لە هاوینی ١٣٦٧دا (١٩٨٨)، وەک هەوڵێک بۆ کۆنترۆڵکردنی قەیرانی شەرعییەتی ناوخۆیی و ڕێگریکردن لە ڕەوتی ڕوولەپەرەی لاوازکەوتنی دەسەڵاتەکەی لە بەستێنی جیهانیدا، لە ڕێگەی پەسەندکردنی سەڵاحییەتی مەسعوود پزشکیانەوە و بە مەبەستی بەرزکردنەوەی ڕێژەی بەشداریکردنی خەڵک لە هەڵبژاردندا، هەوڵی دا سیمایەکی نوێ لە خۆی نیشان بدات. لەگەڵ ئەمەیشدا هەوڵەکانی بێئەنجام بوون. ئاوڕدانەوەیەک لە ئاماری فەرمیی ڕێژەی بەشداریکردن لە هەڵبژاردندا کە هەمیشە لە لای ڕای گشتی گومانی خراوەتە سەر، نیشاندەری ئەوە بوو کە سەرەڕای بانگەشەی بەربڵاو بۆ ڕاکێشانی جەماوەر بۆ بەردەم سندووقەکانی دەنگدان، زۆرینەی کۆمەڵگە بایکۆتی هەڵبژاردنەکانیان کردووە. لەم نێوانەدا، پارێزگای کوردستان بە ڕێژەی بەشداریکردنی لە سەدا ٢٣، کەمترین ڕێژەی بەشداریکردنی لە ئاست هەموو ئێراندا تۆمار کرد.

بەرزبوونەوەی ڕێژەی لەسێدارەدانەکان لە ئێراندا شەپۆلێکی بەربڵاو لە پەرچەکرداری نیگەتیڤی لە لای ڕای گشتی و ڕێکخراوە نێودەوڵەتییەکان لێ کەوتەوە. هەر لەم ساڵەدا کەمپەینێک لەژێر ناوی «سێشەممەکانی نا بۆ سێدارە» لە هەندێ زیندانی ئێراندا دەستی پێ کرد و تا ئێستایش درێژەی هەیە. هەروەها هەندێ لە بنەماڵەکانی بەندکراوانی تۆمەتە پێوەندیدارەکان بە «مادەی هۆشبەر» و هەندێ بنەماڵەی زیندانیانی سیاسی چەندین جار بە مەبەستی دەربڕینی ناڕەزایی لە بەرانبەر سزای لەسێدارەداندا لە بەردەم پارلەمانی ئێران و زیندانی ئێڤینی تاراندا گرد بوونەوە. دوایین ڕاپۆرتی نێردەی تایبەتی ڕێکخراوەی نەتەوە یەکگرتووەکان بۆ کاروباری مافی مرۆڤ لە ئێرانیشدا کە ڕەشەمەی ساڵی ڕابردوو (مارسی ٢٠٢٥) بڵاو کرایەوە، وێڕای دەربڕینی نیگەرانی لە ئاست بەرزبوونەوەی ڕێژەی لەسێدارەداندا، جەختی کردووەتەوە کە «زیاترین ڕێژەی لەسێدارەدانەکان لە ناو کەمینەکانی کورد و بەلووچدا بووە».

لەم ساڵەدا پێنج زیندانیی سیاسیی کورد بە ناوەکانی پەخشان عەزیزی، وریشه مورادی، حەمید حسەیننژاد حەیدەرانلوو، مێحراب عەبدوڵڵازاده و پژمان سوڵتانی سزای لەسێدارەدانیان بەسەردا سەپا و سزای دوو کەسیان زۆر خێرا و بەپەلە لە دیوانی باڵای ئێراندا پەسەند کرا. 

کۆماری ئیسلامیی ئێران لە درێژەی سیاسەتی سەرکوتکارانەی خۆیدا، گوشارەکانی بۆ سەر چالاکان و هاووڵاتیانی کورد لە ناوخۆ و دەرەوەی ئێران پەرە پێ دا و هاوکات دەستی کردەوە بە هێرشی مووشەکی بۆ سەر هەرێمی کوردستان. لەم ساڵەدا قۆناغی یەکەمی ڕێکەوتننامەی ئەمنیی سێ لایەنەی نێوان ئێران، ئێراق و هەرێمی کوردستان خرایە بواری جێبەجێکردنەوە و ژمارەیەک بنەماڵەی سەر بە لقە جیاوازەکانی کۆمەڵە لە ناوچەی زڕگوێزەوە گوێزرانەوە بۆ کامپێکی نوێ لە ناوچەی سوورداش. لە هەمان کات و لەگەڵ پەرەسەندنی گرژییەکانی نێوان کۆماری ئیسلامی و ئیسراییلدا، چوار هاووڵاتیی کورد بە تۆمەتی «سیخوڕیکردن بۆ ئیسراییل» سزای لەسێدارەدانیان بەسەردا سەپا.

سوپای پاسدارانی شۆڕشی ئیسلامی کە لە ساڵی ١٣٦٨ـەوە (١٩٨٩) پرۆژەی میلیتاریزەکردنی کوردستانی توندتر و خێراتر کردووەتەوە، لەم ساڵەیشدا دروستکردنی بنکە و بارەگای سەربازی و ڕاکێشانی جادەی لە چیاکانی «شاهۆ» و «کۆساڵان» درێژە پێ دا.

لە دووهەم ساڵڕۆژی سەرهەڵدانی «ژن، ژیان، ئازادی» و کوشتنی حکومەتیی ژینا ئەمینیدا، دوابەدوای بڵاوبوونەوەی بانگەوازی حیزبەکانی کوردستان و ڕێکخراوە جیاوازەکان، دووکانداران و کاسبکارانی هەندێ لە شارەکانی کوردستان مانیان گرت و دووکان و بازاڕەکانیان داخست. سەرەڕای هەوڵ و تەقالای دامودەزگا ئەمنییەکانی کۆماری ئیسلامیی ئێران بۆ ڕێگریکردن لە مانگرتنەکە لە ڕێگای هەڕەشە، گوشار و بانگهێشتکردنی کاسبکاران و چالاکانی مەدەنییەوە، وێنە و گرتە ڤیدیۆییەکان نیشاندەری ئەوە بوون کە ڕۆژی ٢٥ی خەرمانانی ١٤٠٣ (١٥ی سێپتامبەری ٢٠٢٣) مانگرتنێکی بەربڵاو لە زۆربەی شارەکانی کوردستاندا بەڕێوە چووە.

بەپێی ئامارە دەوڵەتییە فەرمییەکان، پارێزگاکانی کوردستان، کرماشان و ئیلام لەسەر ئاستی هەموو ئێران هێشتا هەر لە بەرزترین پلەی هەژاریدان. ژمارەیەکی بەرچاو لە هاووڵاتیانی ئەم پارێزگایانە، بەتایبەت لە ناوچە سنوورییەکاندا، خەریکی کۆڵبەرین، کارێکی ناچاری کە بە هۆی نەبوونی ژێرخانی پیشەسازی و بازرگانی و سەرمایەگوزاریی پێویستەوە بووە بە مەترسییەکی گەورە بۆ سەر گیانی کۆڵبەران. حکومەت لەباتیی گرتنەبەری ڕێچارەی ئابووری و دروستکردنی هەلی کار، بە شێوەیەکی توندوتیژ و سەرکوتکارانە درێژە بە کوشتنی سیستماتیکی کۆڵبەران دەدات.

لە ساڵی ١٤٠٣دا لانیکەم ٥١٤ هاووڵاتی و چالاکوانی کورد لە لایەن هێزە ئەمنییەکان یان دامودەزگا دادوەرییەکانی کۆماری ئیسلامیی ئێرانەوە لە شارە جیاوازەکانی پارێزگاکانی ئازەربایجانی ڕۆژئاوا، کوردستان، کرماشان، ئیلام، هەمەدان، تاران و خوراسانی ڕەزەوی بە هۆکاری سیاسی دەستبەسەر کراون. زیاترین ڕێژەی دەستبەسەرکردنەکان لە شارەکانی پارێزگاکانی ئازەربایجانی ڕۆژئاوا و کوردستان بووە.

لە نێو دەستبەسەرکراواندا ١٠ منداڵ، ٥ مامۆستا و چالاکی ئایینی، ٧ هاووڵاتی و چالاکی یارسان و ١٨ ئەندامی بنەماڵەی دادخوازان کە ئازیزانیان بە دەستی کۆماری ئیسلامیی ئێران کوژراون، دەبینرێن.
ئەگەرچی هەندێ لەم کەسانە دوای ماوەیەک بە دانانی بارمتە و بە شێوەی کاتی ئازاد کراون، بەڵام ژمارەیەکی تریان تا ئێستا هەر دەستبەسەرن و هەندێکیشیان بە مەبەستی تێپەڕاندنی ماوەی سزاکەیان ڕەوانەی زیندان کراون.

لە ساڵی ١٤٠٣دا بۆ لانیکەم ٩٣ هاووڵاتی و چالاکی کورد لە لایەن دادگاکانی شۆڕشی ئیسلامی و کەیفەریی پارێزگا جیاوازەکانەوە سزای لەسێدارەدان، بەندکران، بەندکرانی هەڵپەسێردراو، لێدانی قامچی، دوورخستنەوە، پێبژاردنی سزای پارە و… دەر کراوە یان لە دادگای پیاچوونەوە و دیوانی باڵای ئێراندا پەسەند کراوە.

لەم ساڵەدا زیاترین حوکمەکان لە لایەن دادگا کەیفەرییەکان و دادگاکانی شۆڕشی ئیسلامیی پارێزگاکانی ئازەربایجانی ڕۆژئاوا و کوردستانەوە دەر کراوە.

لە ئێستەدا لانیکەم ١٠ هاووڵاتی و چالاکی سیاسیی کورد لەژێر حوکمی لەسێدارەداندان و لانیکەم ٧ کەسی دیکەیش لە بەردەم مەترسیی سەپاندنی هەمان ئەو سزایەدان. ئەم کەسانە کە هەندێکیان لە ڕەوتی سەرهەڵدانی «ژن، ژیان، ئازادی»دا دەستبەسەر کراون، لە دۆخێکی نادادپەروەرانەدا، لەوانە بێبەشکردن لە پارێزەری دیاریکراو، ئەشکەنجەی قورسی جەستەیی و دەروونی و دادگاییکردنی نادادپەروەرانە، ڕووبەڕووی سزای لەسێدارەدان بوونەتەوە. بنەماڵەکانی ئەم زیندانیانە و دامەزراوەکانی مافی مرۆڤ هۆشدارییان داوە لەمەڕ دۆخی قەیراناوییان و مەترسیی پەسەندکردن و جێبەجێکردنی سزاکانیان و داوایان کردووە سەرجەم ئەو سزایانە هەڵبوەشێتەوە و ئاوڕی خێرا لە دۆخی قەیراناویی هەنووکەیان بدرێتەوە.

حەوت زیندانیی سیاسی و مەزهەبیی کورد بە ناوەکانی پەخشان عەزیزی، وریشە مورادی، حاتەم ئوزدەمیر، یووسف ئەحمەدی، مێحراب عەبدوڵڵازادە، حەمید حسەیننژاد حەیدەرانلوو، سامان محەممەدیی خەیارە و پژمان سوڵتانی کە پێشتر لە لایەن دادگای شۆڕشی ئیسلامیی شارەکانی تاران، ورمێ و سنەوە بە تۆمەتی «بەغی»، «موحارەبە» و «کوشتنی بەئەنقەست» سزای لەسێدارەدانیان بەسەردا سەپاوە، ئێستە لە زیندانە ناوەندییەکانی سنە و ورمێ و زیندانی ئێڤینی تاران و قزلحەساری کەرەجدان.

دۆسیەکانی وریشە مورادی و مێحراب عەبدوڵڵازادە دوای تانەلێدان نێردراونەتە بەردەم دیوانی باڵای ئێران و لە نۆبەتی تێهەڵچوونەوە و لێکۆڵینەوەی دووبارەدان. بەڵام سزای پەخشان عەزیزی، حەمید حسەیننژاد حەیدەرانلوو، حاتەم ئوزدەمیر، یووسف ئەحمەدی و سامان محەممەدیی خەیارە لە دیوانی باڵای ئێران پەسەند کراون و مەترسیی جیدیی لەسێدارەدانیان لە ئارادایە.

هەروەها سێ هاووڵاتیی کوردی دیکە بە ناوەکانی ئازاد شوجاعی، ڕەسوول ئەحمەد ڕەسوول و ئیدریس ئالی لە لایەن دادگای شۆڕشی ئیسلامیی ورمێوە بە تۆمەتی «سیخوڕیکردن بۆ ئیسراییل» سزای لەسێدارەدانیان بەسەردا سەپاوە و ئێستە لە زیندانی ناوەندیی ورمێدان. دۆسیەی هەر پێنجیان بە شێوەی تایبەت لە دیوانی باڵای ئێراندا لێکۆڵینەوەی بۆ دەکرێت.

لە لایەکی ترەوە لانیکەم حەوت هاووڵاتی و چالاکی کورد بە ناوەکانی عەلی قاسمی، کاوە ساڵحی، ڕزگار بەیگزادەی بابامیری، جوامێر مام‌خەسرەی، محەممەد خەسرەوی، محەممەد فەرەجی، ڕەوف شێخ‌مەعرووفی و سلێمان ئەدهەمی کە زۆربەیان لە ڕەوتی سەرهەڵدانی «ژن، ژیان، ئازادی»دا لە لایەن هێزە ئەمنییەکانەوە لە شارەکانی سنە و بۆکان دەستبەسەر کراون و ئێستە لە زیندانەکانی ورمێ و بۆکاندان، لە سزانامەکانیاندا هەندێ تۆمەتی قورسی وەک «بەغی»‌، «افساد فی‌الارض» و «موحارەبه»یان ڕووبەڕوو کراوەتەوە و هەر ئەمەش وای کردووە نیگەرانییەکان لە ئاست ئەگەری سەپاندنی سزای لەسێدارەدان بەسەریاندا پەرە بسێنێت.

تۆڕی مافەکانی مرۆڤی کوردستان جێبەجێکردنی سزای لەسێدارەدانی ١٢٠ بەندکراوی کوردی لە ساڵی ١٤٠٣دا لە زیندانە جیاوازەکانی ئێراندا تۆمار و پشتڕاست کردووەتەوە. زیاترین ڕێژەی لەسێدارەدانەکان لە زیندانی قزلحەساری کەرەج، زیندانی ناوەندیی ورمێ و زیندانی دیزڵئاوای کرماشاندا بووە.
تۆمەتەکانی ٦٤ کەسیان «تاوانی پێوەندیدار بە مادە هۆشبەرەکانەوە» بووە، هەروەها ٤٨ کەس بە تۆمەتی «کوشتنی بەئەنقەست» و ٤ کەسیش بە تۆمەتی «دەستدرێژیکردن بە زۆر» لە سێدارە دراون. هەر لەم ساڵەدا ٣ زیندانیی مەزهەبیی کورد بە ناوەکانی ئەنوەر خزری، خەسرەو بەشارەت و کامران شێخە بە تۆمەتی «افساد فی‌الارض» و زیندانییەکی سیاسی بە ناوی ڕەزا ڕەسایی، هاووڵاتیی کوردی یارسان و لە دەستبەسەرکراوانی سەرهەڵدانی «ژن، ژیان، ئازادی»، بە تۆمەتی «بەشداریکردن لە کوشتن»ی کاربەدەستێکی ئەمنیدا لە سێدارە دران.

لە ساڵی ١٤٠٣ لانیکەم ٣٩ کۆڵبەری کورد لە ناوچە سنوورییەکانی پارێزگاکانی ئازەربایجانی ڕۆژئاوا، کوردستان و کرماشان گیانیان لە دەست داوە. لەم ژمارەیە، ٢٧ کۆڵبەر بە تەقە و دەسڕێژی هێزە چەکدارەکانی کۆماری ئیسلامیی ئێران، ٢ کەس بە هۆی داکەوتن لە بەرزایی و کەوتنە ناو ڕووبارەوە لە ئەنجامی ڕاوەدوونانی ئەو هێزانەدا گیانیان لە دەست دا. هەروەها یەک کەسیش بە دەسڕێژی هێزەکانی پاسەوانی سنووری ئێراق کوژراون. جیا لەمە، ٤ کەس (لەوانە منداڵێک) بە هۆی ڕەقبوونەوە لە سەرمادا، ٣ کەس بە هۆی داکەوتن لە بەرزاییەوە، یەک کەس بە هەرەسی بەفر و ٢ کەسیش بە هۆی جەڵدە و وەستانی دڵەوە لە کاتی کۆڵبەریدا گیانیان لە دەست داوە.
لەم ساڵەدا سنوورەکانی شارەکانی بانەی پارێزگای کوردستان و پاوەی پارێزگای کرماشان، هەرکامە بە ١٠ حاڵەتی کوشتنی کۆڵبەرانەوە و سەردەشتی پارێزگای ئازەربایجانی ڕۆژئاوا بە ٨ حاڵەتەوە، کوشندەترین شوێنەکان بۆ کۆڵبەران بوون.

هەر لەم ساڵەدا لانیکەم ١١٠ کۆڵبەر (لەوانە ٣ منداڵ) لە ناوچە سنوورییەکانی پارێزگاکانی ئازەربایجانی ڕۆژئاوا، کوردستان و کرماشان بریندار یان زامدار بوون. لەم ژمارەیە، ٩٨ کەس بە دەسڕێژ یان ئەشکەنجە و لێدانی هێزە چەکدارەکانی کۆماری ئیسلامیی ئێران و ٢ کەسیش لە کاتی ڕاوەدوونران لە لایەن ئەو هێزانەوە بریندار بوون. هەروەها ٧ کەس بە هۆی داکەوتن لە بەرزاییەوە و ٣ کەسیش بە تەقینەوەی مین لە ڕێگای کۆڵبەریدا بریندار یان کەمئەندام بوون.
لەم ساڵەدا سنوورەکانی شارەکانی پاوەی پارێزگای کرماشان و بانەی پارێزگای کوردستان مەترسیدارترین شوێنەکان بۆ برینداربوونی کۆڵبەران بوون.

لە ساڵی ٢٠٢٤دا لانیکەم ٢٢ حاڵەتی ژنکوشتن لە کوردستاندا تۆمار کراوە کە سێ کەسیان تەمەنیان ٧، ١٦ و ١٧ ساڵان بوو و دوو کەسیشیان قوربانیی دیاردەی «منداڵ-هاوسەری» بوون. هەروەها لە حاڵەتێکدا منداڵێکی ٢ ساڵانیش لەگەڵ دایکیدا گیانی لە دەست داوە.

لە زۆربەی حاڵەتەکاندا بکوژەکان پیاوانی ئەندامی بنەماڵەی ژنانی قوربانی بوون؛ ١٣ ژن بە دەستی هاوسەر، ٦ ژن بە دەستی باوک، ٢ ژن بە دەستی خوازبینیکەر و منداڵێکی ٧ ساڵانیش بە دەستی برای هاوڕێکەی کوژراون. لە یەک لەو حاڵەتانەدا بکوژ دوای کوشتنەکە خۆیشی کوشتووە.

شێوازی کوشتنی قوربانیان بەم جۆرە بووە: ٧ ژن بە چەکی گەرم، ٧ ژن بە چەقۆ، ٣ ژن بە ئاگرتێبەردانی بەئەنقەست، ٢ ژن بە ئەشکەنجە و بەرکەوتنی سەر، ژنێک بە خنکاندن، ژنێک بە خنکاندنی پلان بۆدانراوی بەئەنقەست و حاڵەتێکیش دەستدرێژیکردن بە زۆر لەگەڵ سووتان و پێدانی دەرماندا (حاڵەتی منداڵە ٧ ساڵەکە).

لە ڕووی جیاکردنەوەی پارێزگاکانەوە، ٧ حاڵەت لە پارێزگای ئیلام، ٥ حاڵەت لە پارێزگای کرماشان،  ٤ حاڵەت لە پارێزگای کوردستان، ٤ حاڵەت لە پارێزگای ئازەربایجانی ڕۆژئاوا، ١ حاڵەت لە پارێزگای خوراسانی باکوور و ژنێکی خەڵکی ئیلامیش لە پارێزگای هورموزگان کوژراون.

لە ساڵی ١٤٠٣دا لانیکەم ١٢ هاووڵاتیی کورد لە لایەن هێزە چەکدارەکانی ئێران و تورکیاوە لە پارێزگاکانی ئازەربایجانی ڕۆژئاوا، کرماشان، کوردستان و تاران کوژراون. لە کۆی ئەم کەسانە ٧ کەسیان بە دەسڕێژی هێزەکانی پۆلیسی ئینتیزامی، ٣ کەس بە دەسڕێژی هێزە سنوورپارێزەکانی ئێران و ٢ کەسیش بە بۆردومانی درۆنەکانی ئەرتەشی تورکیا کوژراون.

لە ساڵی ١٤٠٣دا لانیکەم دوو هاووڵاتیی کورد لە زینداندا گیانیان لە دەست دا. 

کیانووش وەلەدبەیگی، بەندکراوی تۆمەتبار به «مادە هۆشبەرەکان» ڕۆژی ١٩ی گوڵانی ١٤٠٣ (٨ی مەیی ٢٠٢٥) بە هۆی پێڕانەگەیشتنی پزیشکی و ناردنی درەنگەوە بۆ ناوەندە پزیشکییەکان، لە زیندانی قزلحەساری کەرەج گیانی لە دەست دا. 

هەروەها زیندانییەکی کوردی دیکە بە ناوی کامران کازمی کە بە تۆمەتی «دزیکردن» لە دەستبەسەرگەی پۆلیسی ئاگاهیی ورمێدا بوو، لە ڕەشەمەی ١٤٠٣دا (فێبرییەی ٢٠٢٥) بە شێوەیەکی گوماناوی گیانی لە دەست دا. ئەگەرچی کاربەدەستانی ئەم دەزگایەی پۆلیس ڕایانگەیاند کە کامران کازمی لە هەوڵێکی «خۆکوشتن»دا گیانی لە دەست داوە، بەڵام هەندێ لەوانەی لەگەڵ ئەم هاووڵاتییەدا دەستبەسەر بوون وتوویانە کە هاوبەندییەکەیان لەژێر ئەشکەنجەی هێزەکانی پۆلیسدا کوژراوە.

لە ساڵی ١٤٠٣دا لانیکەم ٥ کەس بە هۆی تەقینەوەی مینەوە لە پارێزگاکانی ئازەربایجانی ڕۆژئاوا، کوردستان، کرماشان و ئیلام کوژران و لانیکەم ٨ کەسیش بریندار یان کەمئەندام بوون. 

هەندێ لەم مین و تەقەمەنیانە پاشماوەی شەڕی ئێران و ئێراق و هێرشی سەربازیی کۆماری ئیسلامین بۆ سەر کوردستان لە دەیەی ٦٠ی هەتاویدا (هەشتاکانی زایینی)، هەندێکیشیان لە مانۆڕە سەربازییەکانی کۆماری ئیسلامیی ئێران و لەم ساڵانەی دواییدا بە مەبەستی بەرەوڕووبوونەوەی هێزەکانی سەر بە حیزبە ئۆپۆزیسیۆنە کوردەکان لە ناوچەکەدا چێنراون.

لە ساڵی ١٤٠٣دا لانیکەم ١٣ پەناخوازی کورد لە کاتی پەڕینەوەدا بۆ وڵاتانی ڕۆژئاوای ئەورووپا گیانیان لە دەست دا. ١١ کەسیان لە ڕووداوی نوقمبوونی بەلەم لە کەناراوەکانی ئیتالیادا گیانیان لە دەست دا و ٢ کەسی دیکەیش بە دەسڕێژی گوللەی هێرشبەرێک لە کامپی پەناخوازانی «دانکیخ» لە باکووری فەرەنسا کوژران.

لە ساڵی ٢٠٢٤دا چەندین تێکهەڵچوونی چەکداری لە نێوان هێزەکانی سوپای پاسداران و حیزبە ئۆپۆزیسیۆنە کوردەکان لە ناوچە جیاوازەکانی کوردستاندا ڕووی دا:

• ١٩ی پووشپەڕی ١٤٠٣ (٩ی جولایی ٢٠٢٤): لە گوندی «تاژاندەرە»ی شنۆ تێکهەڵچوونێک لە نێوان هێزەکانی سوپای پاسداران و ئەندامانی حیزبێکی کوردستاندا ڕووی دا کە لە ئەنجامدا لانیکەم کەسێک کوژرا و کەسێکیش بە برینداری دەستبەسەر کرا.
• ٢٩ی خەرمانانی ١٤٠٣ (١٩ی سێپتامبەری ٢٠٢٤): ڕێبوار کەریمیان، بەرپرسی سەربازیی کۆمەڵەی زەحمەتکێشانی کوردستان، لە نزیک گوندی «پیرانەکۆن»ی مەریوان کەوتە بۆسەی هێزەکانی سوپای پاسداران و گیانی بەخت کرد.
• ١ی گەڵاڕێزانی ١٤٠٣ (٢٢ی ئۆکتۆبەری ٢٠٢٤): لە تێکهەڵچوونی نێوان سوپای پاسداران و ئەندامانی پارتی ژیانی ئازادی کوردستاندا (پژاک) لە نزیک گوندی «دێوەزناو»ی سەوڵاوا، ئەندامێکی سوپا بە ناوی محەممەد ئەحمەدپوور کوژرا و سێ کەسی دیکەیش بریندار بوون.
• ٩ی گەڵاڕێزانی ١٤٠٣ (٣٠ی ئۆکتۆبەری ٢٠٢٤): سوپای پاسداران ڕایگەیاند کە لە چالاکییەکی ئاڵۆزی هەواڵگریدا کە بە پشتیوانیی کرداریی قەرارگای حەمزەی سەیدولشوهەدای سوپای پاسداران ئەنجام دراوە، ئەندامێکی حیزبێکی ئۆپۆزیسیۆنی کوردی کوشتوە و دوو ئەندامی دیکەیشیانی دەستبەسەر کردووە. پارتی ژیانی ئازادی کوردستان (پژاک) ڕۆژی ١٣ی گەڵاڕێزانی ١٤٠٣ (٣ی نۆڤامبەری ٢٠٢٤) لە ڕاپۆرتێکدا ڕایگەیاند کە ئەندامێکی ئەم پارتە بە ناوی مەولان ڕوستەمی، خەڵکی سەردەشت، لەو چالاکییەدا کوژراوە.

لە ساڵی ١٤٠٣دا سزای بڕینەوەی چوار پەنجەی دەستی ڕاستی شەهاب تەیمووری و مێهرداد تەیمووری، دوو برای بەندکراوی خەڵکی سەرپێڵی زەهاوی کرماشان، لە زیندانی ناوەندیی ورمێ جێبەجێ کرا، ئەم دوو هاووڵاتییە دوای چەند کاتژمێر مانەوە لە نەخۆشخانە گەڕێنرانەوە بۆ بەشی وەرگرتنی زیندان.

ئێستە لە زیندانی ناوەندیی ورمێدا لانیکەم پێنج زیندانیی دیکەیش بە ناوەکانی هادی ڕوستەمی، مێهدی شەرەفیان، مێهدی شاهیوەند، کەسرا کەرەمی و مورتەزا ئیسماعیلیان لە بەردەم مەترسیی جێبەجێکردنی سزای بڕینەوەی ئەندامی جەستەیاندان.

ئیسماعیل کەریمی، چالاکی ژینگەپارێز و فەرمانبەری ئیدارەی کانزا سروشتییەکانی کامێران کە لە کاتی کۆنترۆڵکردنی ئاگری دارستانەکانی «کانیشە»ی ئەم شارەدا تووشی سووتان بووبوو، ڕۆژی ٣ی گەلاوێژی ١٤٠٣ (٢٤ی جولایی ٢٠٢٤) بە هۆی سووتانی سەرتر لە ٨٠ دەرسەدەوە لە نەخۆشخانە گیانی بەخت کرد.