تۆڕی مافه‌كانی مرۆڤی کوردستان

لە دەسپێکی شەپۆلی نوێی خۆپیشاندانە جەماوەرییە بەربڵاوەکانەوە کە ڕۆژی ٧ی بەفرانباری ١٤٠٤ (٢٨ی دیسامبەری ٢٠٢٥) دەستی پێ کرد و تا ئێستایش هەر درێژەی هەیە، ڕاپۆرتە پشتڕاستکراوەکان باس لە کوشتنی سەدان کەس لە شارە جیاوازەکاندا دەکەن. هەندێ سەرچاوە ژمارەی گیانبەختکردوان بە هەزاران کەس دەخەمڵێنن. هێڵەکانی ئینتەرنێت چەندین ڕۆژە بەتەواوی لە لایەن حکومەتەوە داخراوە و تەنانەت ڕێگای پێوەندیی تەلەفۆنی لە وڵاتانی ترەوە بۆ ئێران بەستراوە، هەر بۆیە وەرگرتنی زانیاریی ورد سەبارەت بە بارودۆخی ناوخۆ ڕووبەڕووی بەربەستی جیدی بووەتەوە. هەر بۆیە ئامارێکی ورد لەسەر ژمارەی گیانبەختکردوان بەردەست نەکەوتووە، بەڵام بەپێی ئەو ڕاپۆرت و گرتەڤیدیۆییە کەمانەی لە ئێرانەوە نێردراون، کۆمەڵکوژییەکی زۆر گەورە ڕووی داوە.

جیا لەمە، سەدان هاووڵاتیی ناڕازیی دیکەیش بە دەسڕێژی چەکی جەنگی و ساچمەیی و هەروەها پەلاماری باتۆمی هێزە سەربازی و ئەمنییەکانەوە بریندار بوون و ژمارەی دەستبەسەرکراوان لە هەموو ئێراندا هەزاران کەسی تێ پەڕاندووە. کاربەدەستانی دادوەری و دەوڵەتیی کۆماری ئیسلامی بە شێوەی بەردەوام لەسەر بەشداریکردن لە خۆپیشاندانەکاندا هەڕەشە لە خەڵک دەکەن و تۆمەتی «موحارەب»یان ڕووبەڕوو دەکەنەوە، ئەمەیش بووەتە هۆی ورووژانی نیگەرانییەکی قووڵ لە بەرانبەر بارودۆخی دەستبەسەرکراواندا.

تۆڕی مافەکانی مرۆڤی کوردستان بە هۆی بەربەستەکانی بەردەم بەدەستهێنانی زانیاریی متمانەپێکراو، تەنها توانیویەتی کوژرانی ٣٢ هاووڵاتیی کورد بە دەستی  هێزە سەربازی و ئەمنییەکانی کۆماری ئیسلامیی ئێران لە شارەکانی کووهدەشت و نوورئابادی دولفانی پارێزگای لوڕستان، مەڵکشایی پارێزگای ئیلام، کرماشان، شاباد و هەرسینی پاڕێزگای کرماشان، چنارانی پارێزگای خوراسانی ڕەزەوی و تاران و قەڵعە حەسەنخانی پارێزگای تاران پشتڕاست بکاتەوە.

لانیکەم دوو سەرچاوە لە ناو کەرتی تەندروستی و بنەماڵەی گیانبەختکردوانی کرماشانەوە کە تۆڕی مافەکانی مرۆڤی کوردستان توانیویەتی قسەیان لەگەڵ بکات، وتوویانە دەیان هاووڵاتیی خۆپیشاندەر لە خۆپیشاندانە جەماوەرییەکانی ئەم شارەدا بە دەسڕێژی هێزەکانی سوپای پاسداران کوژراون. بنەماڵەی یەکێک لە گیانبەختکردوان دەڵێن کاتێک بۆ وەرگرتنەوەی تەرمی منداڵەکەمان ڕۆیشتبووین بە چاوی خۆمان بینیومانە کە سوپای پاسداران بە پاسەکانی کەرتی گواستنەوەی ناوشار تەرمی گیانبەختکردوانیان دەگواستەوە.

تۆڕی مافەکانی مرۆڤی کوردستان لەگەڵ کۆمەڵێک شایەتحاڵی مەیدانیدا وتووێژی کردووە، هاوکات لێکۆڵینەوەی بۆ ئەو گرتەڤیدیۆیی و وێنانە کردووە کە لە خۆپیشاندانی شارە جیاوازەکان بڵاو بووەتەوە. لە ئەنجامی ئەم لێکۆڵینەوانەدا دەر کەوتووە کە لانیکەم ٣٢ هاووڵاتیی خۆپیشاندەری کورد بە چەکی جەنگی و بە زۆری بە دەستی هێزەکانی سوپای پاسداران کوژراون. دوای گیانبەختکردنی ئەو هاووڵاتیانە، سوپای پاسداران لە ڕێگای بەبارمتەگرتنی تەرمەکانەوە گوشاری خستووەتە سەر بنەماڵەکانیان تاکوو بڵێن منداڵەکانیان بە دەستی خۆپیشاندەران کوژراون یان وەک ئەندامی هێزەکانی بەسیج لە قەڵەمیان بدەن. هەروەها لە هەندێ حاڵەتدا هەڕەشەیان لە بنەماڵەکان کردووە کە دەبێ بڵێن منداڵەکەیان بە هۆی داکەوتن لە بەرزاییەوە کوژراوە و بۆ ڕادەستکردنەوەی تەرمەکانیش داوای پارەیان لە هەندێ بنەماڵە کردووە، تۆڕی مافەکانی مرۆڤی کوردستان تا ئێستا توانیویەتی بۆ یەک حاڵەت، بورهان سەیدی، وەرگرتنی پارە بۆ ڕادەستکردنەوەی تەرم پشتڕاست بکاتەوە.

هەروەها وەزارەتی ئیتلاعات و دەزگای ئیتلاعاتی سوپای پاسداران دوای دەسپێکردنی خۆپیشاندانەکان لە شارە جیاوازەکانی کوردستاندا هەندێ لە چالاکوانانی مەدەنی، زیندانیانی سیاسیی پێشوو و بنەماڵەی دادخوازانیان بۆ دامودەزگا ئەمنییەکان بانگهێشت کردووە و هەڕەشەیان لێ کردوون کە بۆیان نییە لە هیچ جۆرە گردبوونەوەیەکدا بەشداری بکەن و نابێ هیچ جۆرە بابەتێکیش لە تۆڕە کۆمەڵایەتییەکاندا سەبارەت بەم خۆپیشاندانانە بڵاو بکەنەوە.

هاوکات هێزەکانی سوپای پاسداران لە زۆربەی شارەکانی کوردستاندا جێگیر کراون و بە شوێنە گشتییەکاندا دەسووڕێنەوە، هەروەها لە دەروازەکانی هەندێ لە شارەکاندا بازگەی پشکنین دانراوە و کەشێکی ئەمنیی توند بەسەر ئەو ناوچانەدا زاڵ کراوە.

ڕۆژی ١٣ی بەفرانباری ١٤٠٤ (٣ی ژانڤییەی ٢٠٢٦) دوابەدوای خۆپیشاندانە جەماوەرییەکانی مەڵکشایی ئیلام کە لە لایەن هێزەکانی سوپای پاسدارانەوە بە شێوەیەکی خوێناوی سەرکوت کرا، ڕەوتی خۆپیشاندانەکان لە شارە جیاوازەکانی ئیلامدا هەرچی زیاتر پەرەی سەند. دوای گواستنەوەی بریندارانی خۆپیشاندانەکەی مەڵکشایی بۆ نەخۆشخانەی خومەینیی ئیلام، هێزەکانی یەکەی تایبەت دوو شەوی لەسەریەک بە مەبەستی دەستبەسەرکردنی برینداران هێرشیان کردە سەر نەخۆشخانەکە و ڕەوتی خزمەتگوزاریی پزیشکی و دەرمانکردنی برینداران و نەخۆشە ئاساییەکانیشیان تێک دا. هاوکاتیش هێرشیان کردە سەر گردبوونەوەی بنەماڵەی بریندارەکان و دوای پەلاماردان و لێدانیان، ژمارەیەک لەو هاووڵاتیانەیان دەستبەسەر کرد.

ڕۆژی ١٨ی بەفرانباری ١٤٠٤ (٨ی ژانڤییەی ٢٠٢٦) وەک پەرچەکردارێک لە بەرانبەر کوشتنی خەڵکی ناڕازی لە لایەن کۆماری ئیسلامییەوە، لە زیاتر لە ٢٠ شاری هەر چوار پارێزگاکەی کوردستاندا مانگرتنی بەربڵاو بەڕێوە چوو و کاسبکاران و بازاڕیان دووکانەکانیان داخست. دوانیوەڕۆی هەمان ڕۆژ و هاوکات لەگەڵ پچڕانی هێڵەکانی ئینتەرنێتدا، خۆپیشاندانی جەماوەریی بەربڵاو لە هەندێ شار و لەوانە لە کرماشاندا دەستی پێ کردەوە. هێزەکانی سوپای پاسداران لە شوێنە جیاجیاکانی ئەم شارە و لەوانە دەرەدرێژ، ئیلاهییە، نەوبەهار و ڕەشیدی بە چەکی جەنگی هێرشیان کردە سەر خۆپیشاندەران کە بووە هۆی کوشتنی ژمارەیەکی زۆر لە هاووڵاتیان، بەڵام هەر بە هۆکاری پچڕانی هێڵەکانی ئینتەرنێت تا ئێستا زانیارییەکی ورد لەسەر ژمارەی گیانبەختکردوان بەردەست نەکەوتووە.

بە گوێرەی لێکۆڵینەوەی ڕاپۆرت و وێنەکان و هەروەها وتووێژەکان لەگەڵ سەرچاوە ئاگادارەکان و شایەتحاڵە مەیدانییەکاندا، لە سەرەتای خۆپیشاندانەکانەوە تا ئەمڕۆ لە شارەکانی کووهدەشت و نوورئابادی دولفانی پارێزگای لوڕستان، دەڕەشار، ئیلام، دێلوڕان، ئاودانان، مێهران، سەراوڵە، کارەزان و مەڵکشایی پارێزگای ئیلام، هەرسین، کرماشان، قەسری شیرین، شاباد و گیەڵانی پارێزگای کرماشان، کامێران، بیجاڕ و قوروەی پارێزگای کوردستان، بوجنوورد و ئەسفەراینی پارێزگای خوراسانی باکوور و چنارانی پارێزگای خوراسانی ڕەزەوی، خۆپیشاندان و ناڕەزایی بەربڵاو بەڕێوە چووە.

لە درێژەی ئەم ڕاپۆرتەدا ناونیشان و زانیاریی گیانبەختکردوان و شێوازی کوشتنیان، هەروەها دوایین پێرستی ئەو دەستبەسەرکراونەی لە لایەن تۆڕی مافەکانی مرۆڤی کوردستانەوە پشتڕاست کراونەتەوە، بڵاو دەکەینەوە.

ئەمیرحیسام خودایاریفەرد، هاووڵاتیی ٢٢ ساڵان و دانیشتووی کووهدەشت، ڕۆژی ١٠ی بەفرانباری ١٤٠٤ (٣١ی دیسامبەری ٢٠٢٥) بە دەسڕێژی هێزەکانی سوپای پاسدارانی شۆڕشی ئیسلامی گیانی بەخت کرد. سوپای پاسداران لە بەیاننامەیەکدا ڕایگەیاند کە ئەم هاووڵاتییە ئەندامی بەسیج بووە، بەڵام باوکی ڕۆژی ١٢ی بەفرانباری ١٤٠٤ (٢ی ژانڤییەی ٢٠٢٦) لە ڕێوڕەسمی ئەسپەردەکردنەکەیدا ئەم دەنگۆیەی بەدرۆ خستەوە و ڕایگەیاند کە کوڕەکەی بە دەستی هێزە ئەمنییەکان کوژراوە. سوپای پاسداران لافیتەیەکی سەرەخۆشییان لە بەردەرگای ماڵەکەیشیاندا هەڵواسیبوو بەڵام بنەماڵەکەی لافیتەکەیان داگرت و خەڵکیش هێزەکانی سوپای پاسدارانیان لە شوێنی ئەسپەردەکردنەکە کردە دەرەوە.

ئەحەد ئیبراهیمپووری عەبدولی، کرێکاری ٣٤ ساڵانی خەڵکی نوورئابادی لوڕستان، ڕۆژی ١١ی بەفرانباری ١٤٠٤ (١ی ژانڤییەی ٢٠٢٦) لە خۆپیشاندانە جەماوەرییەکانی ئەم شارەدا لە بولواری ئازادی کەوتە بەر دەسڕێژی هێزەکانی سوپای پاسداران و گوللە بەر دڵی کەوت و دەسبەجێ گیانی بەخت کرد. هێزە ئەمنییەکان تەرمەکەیان گواستەوە بۆ نەخۆشخانەی ئیبنی سینا و بە مەبەستی ڕێگریکردن لە بڵاوبوونەوەی هەواڵەکە و بەڕێوەنەبردنی ڕێوڕەسمی ئەسپەردەکردن، گوشارێکی زۆریان خستە سەر بنەماڵەکەی. تەرمەکەی ڕۆژی ١٣ی بەفرانبار (٣ی ژانڤییە) ڕادەستی بنەماڵەکەی کرایەوە و هەمان ڕۆژ ڕێوڕەسمی ئەسپەردەکردنی بە بەشداریی بەرچاوی خەڵک بەڕێوە چوو.

عەلی عەزیزی، هاووڵاتیی خەڵکی هەرسینی کرماشان، ڕۆژی هەینی ١٢ی بەفرانباری ١٤٠٤ (٢ی ژانڤییەی ٢٠٢٦) بە دەسڕێژی هێزەکانی بەسیجی سوپای پاسداران گیانی بەخت کرد. ڕاگەیاندنەکانی سەر بە سوپای پاسداران وەکوو هەمیشە بە سیناریۆسازی هەوڵیان دا بڵێن ئەم هاووڵاتییە ئەندامی بەسیج بووە و بە دەستی خۆپیشاندەران کوژراوە، بەڵام شایەتحاڵە مەیدانییەکان ڕایان گەیاند کە لە ڕیزی خۆپیشاندەراندا بووە و بە دەستی هێزە ئەمنییەکان کوژراوە. بە وتەی کەسانی نزیکی بنەماڵەکەی، باوکی عەلی عەزیزی لەژێر گوشار و هەڕەشەی سوپای پاسداراندا ناچار کراوە گرتەیەکی ڤیدیۆیی بڵاو بکاتەوە و ڕێوڕەسمی ئەسپەردەکردنەکەیشی ڕۆژی ١٤ی بەفرانبار (٤ی ژانڤییە) بە شێوەیەکی دەوڵەتی و لەژێر چاودێریی سوپای پاسداراندا بەڕێوە چوو.

ڕەزا کەدیوەریان و ڕەسوول کەدیوەریان، دوو برای یارسان و خەڵکی کرماشان، لە خۆپیشاندانە جەماوەرییەکانی شەقامی ئەرتەشدا لە گەڕەکی جافرئاوای ئەم شارە بە دەسڕێژی چەکی جەنگیی هێزە ئەمنییەکان بریندار بوون. ڕەسوول دوای گوازرانەوە بۆ نەخۆشخانەی تاڵەقانیی کرماشان گیانی لە دەست دا و ڕەزایش لە بەشی چاودێرییە تایبەتەکانی هەمان نەخۆشخانەدا کەوتە حاڵەتی کۆماوە. دوانیوەڕۆی ١٤ی بەفرانباری ١٤٠٤ (٤ی ژانڤییەی ٢٠٢٦) ڕەزا کەدیوەریانیش بە هۆی سەختبوونی برینەکانیەوە گیانی بەخت کرد. تەرمەکانی ئەم دوو برایە بە ئامادەبوونی هێزە ئەمنییەکان لە گۆڕستانی گشتیی شاری کرماشان ئەسپەردە کران. بە گوێرەی زانیارییە سەرەتاییەکان، ڕەسوول کەدیوەریان لە کاتی کوژراندا تەمەنی ١٧ ساڵ بووە و ڕەزا کەدیوەریانیش ٢٠ ساڵ، هەردووکیشیان کرێکار بوون، بەڵام تۆڕی مافەکانی مرۆڤی کوردستان تا ئێستە نەیتوانیوە تەمەنی دروستی ئەم دوو برا گیانبەختکردووە پشتڕاست بکاتەوە.

ڕەزا قەنبەری، منداڵی ١٦ ساڵانی خەڵکی کرماشان، ڕۆژی ١٣ی بەفرانباری ١٤٠٤دا (٣ی ژانڤییەی ٢٠٢٦) لە خۆپیشاندانە جەماوەرییەکانی گەڕەکی جافرئاوای ئەم شارەدا لە پشت و کەمەرەوە کەوتە بەر دەسڕێژی چەکی جەنگیی هێزەکانی سوپای پاسداران و دەسبەجێ گیانی بەخت کرد. هێزە ئەمنییەکان تەرمی خوێنینی ئەو مێرمنداڵەیان لەگەڵ خۆیان برد و گوشاریان خستە سەر بنەماڵەکەی و هەڕەشەیان لێ کردن کە دەبێ منداڵەکەیان وەکوو ئەندامی هێزەکانی بەسیج بناسێنن و بڵێن خۆپیشاندەران کوشتوویانە، بەڵام بنەماڵەکەی ملیان بەو داواکارییە نەدا. ڕێوڕەسمی ئەسپەردەکردنی ڕۆژی ١٥ی بەفرانبار (٥ی ژانڤییە) لە گوندی «جەبارئاوای سوفلا» لە ناوچەی بێڵەواری سەر بە کرماشان بە بەشداریی بەربڵاوی خەڵک و لەژێر زەخت و گوشاری هێزە ئەمنییەکاندا بەڕێوە چوو.

لەتیف کەریمی، ڕەزا عەزیمزادە و مەهدی ئیمامیپوور، هاووڵاتیانی خەڵکی مەڵکشایی، ڕۆژی ١٣ی بەفرانباری ١٤٠٤ (٣ی ژانڤییەی ٢٠٢٦) لە خۆپیشاندانە جەماوەرییەکانی ئەم شارەدا کەوتنە بەر دەسڕێژی چەکی جەنگیی هێزەکانی سوپای پاسدارانەوە کە لە ناو بنکەی بەسیجی موقاومەتی ناوچەی مەڵکشاییدا جێگیر کرابوون، لە ئەنجامی ئەو دەسڕێژەدا هەرسێکیان گیانیان بەخت کرد. سوپای پاسداران هەمان ڕۆژ لە دووتوێی هەواڵێکدا ڕایگەیاند کە ئەندامێکی ئەم دەزگا سەربازییە بە ناوی لەتیف کەریمی بە دەستی خۆپیشاندەران کوژراوە، بەڵام بنەماڵەی ئەم هاووڵاتییە و شایەتحاڵە مەیدانییەکان ئەو دەنگۆیەیان بەدرۆ خستەوە و وتیان لە گرتەڤیدیۆییەکەیشدا بە ڕوونی دیارە کە لەتیف کەریمی کە ئەندامی خانەنشینی هێزە چەکدارەکان بوو، لە کاتی دەسڕێژەکەدا لە ناو جەماوەری خۆپیشاندەردا بووە و هەر لەوێ بە دەسڕێژی هێزە ئەمنییەکان بریندار بووە و لە لایەن خەڵکەوە گوازراوەتەوە بۆ ئورژانس، واتە لەتیف کەریمی لە خۆپیشاندانەکانی مەڵکشایی بەشدار بووە. هەروەها لەو پرسەنامەیەدا کە بنەماڵەکەی بڵاویان کردەوە، هاوشێوەی پرسەنامەی ئەو دوو گیانبەختکردووەکەی تر ڕستەی «بە کامە تاوان» نووسرابوو. ڕێوڕەسمی ئەسپەردەکردنی ئەم هاووڵاتیانە ڕۆژی ١٤ی بەفرانبار (٤ی ژانڤییە) بە بەشداریی بەربڵاوی خەڵک و وتنەوەی دروشمی دژ بە حکومەت بەڕێوە چوو.

فارس (موحسین) ئاقامحەممەدی، خەڵکی شاری مەڵکشایی ئیلام، ڕۆژی ١٣ی بەفرانباری ١٤٠٤ (٣ی ژانڤییەی ٢٠٢٦) لە خۆپیشاندانە جەماوەرییەکانی ئەم شارەدا بە دەسڕێژی چەکی جەنگیی هێزەکانی سوپای پاسداران لە لای سەرەوە پێکرا و دوای گوازرانەوە بۆ بەشی چاودێرییە تایبەتەکانی نەخۆشخانەی خومەینیی ئیلام، بە ئاستی هۆشیاریی زۆر نزمەوە خرایە ژێر چاودێریی پزیشکییەوە. بەڵام دوانیوەڕۆی ١٥ی بەفرانباری ١٤٠٤ (٥ی ژانڤییەی ٢٠٢٦) بە هۆی سەختبوونی برینەکانیەوە لە نەخۆشخانەدا گیانی لە دەست دا. ڕێوڕەسمی ئەسپەردەکردنی هەمان ڕۆژ بە بەشداریی بەربڵاوی خەڵک و وتنەوەی دروشمی دژ بە حکومەت بەڕێوە چوو.

محەممەدڕەزا کەرەمی، وەرزشکار و بۆکسۆری خەڵکی شاری مەڵکشایی ئیلام، ڕۆژی ١٣ی بەفرانباری ١٤٠٤ (٣ی ژانڤییەی ٢٠٢٦) لە خۆپیشاندانە جەماوەرییەکانی ئەم شارەدا بە دەسڕێژی چەکی جەنگیی هێزەکانی سوپای پاسداران بە سەختی بریندار بوو و گوازرایەوە بۆ بەشی چاودێرییە تایبەتەکانی نەخۆشخانەی خومەینیی ئیلام. ئەم هاووڵاتییە دوای ٤ ڕۆژ مانەوە لە نەخۆشخانە، لە ڕێکەوتی ١٥ی بەفرانباردا (٥ی ژانڤییە) بە هۆی سەختبوونی برینەکانیەوە گیانی لە دەست دا. دەوترێت محەممەدڕەزا لە کاتی گیانبەختکردندا تەمەنی ١٦ ساڵ بووە، بەڵام تۆڕی مافەکانی مرۆڤی کوردستان تا ئێستە نەیتوانیوە پشتڕاستی بکاتەوە و زانیاریی تەواو لەسەر تەمەنی بەدەست بهێنێت. ڕێوڕەسمی ئەسپەردەکردنی هەمان ڕۆژ بە بەشداریی بەربڵاوی خەڵک و وتنەوەی دروشمی دژ بە حکومەت بەڕێوە چوو.

مورتەزا جەهانبەخش، ڕووحوڵڵا ستارەموشتەری، مەهدی وەلیدۆست و مەهدی قورباندۆست، هاووڵاتیانی خەڵکی چنارانی پارێزگای خوراسانی ڕەزەوی، لە خۆپیشاندانە جەماوەرییەکانی ئەم شارەدا بە دەسڕێژی چەکی جەنگیی هێزە ئەمنییەکان کوژران. ڕاگەیاندنەکانی سەر بە حکومەت لەگەڵ پشتڕاستکردنەوەی هەواڵی خۆپیشاندانە جەماوەرییەکاندا ڕایانگەیاندبوو کە ٥ کەس کوژراون، بەڵام هیچ ڕوونکردنەوەیەکیان لەسەر ناسنامەی گیانبەختکردوان نەدابوو. تا ئێستە هیچ زانیارییەک لەسەر ڕادەستکردنەوەی تەرمەکان و بەڕێوەچوونی ڕێوڕەسمی ئەسپەردەکردنیان بەردەست نەکەوتووە.

ڕۆبینا ئەمینیان، خوێندکاری ٢٢ ساڵانی زانکۆی تەکنیکیی شەریعەتیی تاران و خەڵکی مەریوان، ڕۆژی ١٨ی بەفرانباری ١٤٠٤ (٨ی ژانڤییەی ٢٠٢٦) لە خۆپیشاندانە جەماوەرییەکانی تاراندا لە نزیک زانکۆی بەهەشتیی تاران لە پشتەسەرەوە بە چەکی جەنگیی هێزە سەربازی-ئەمنییەکان پێکرا و دەسبەجێ گیانی بەخت کرد. دامودەزگا ئەمنییەکان سەرەتا نەیانهێشتبوو تەرمەکەی ڕۆبینا بە بنەماڵەکەی بدرێتەوە، بەڵام دواجار توانیبوویان بە نهێنی تەرمەکە لە نەخۆشخانە بڕفێنن. سەرەتا دەیانویست لە کرماشان ئەسپەردەی بکەن، بەڵام ژمارەیەکی زۆر هێزی ئەمنی بەر ماڵەکەیان گرتبوون و هاوکات فەوتنامەیشیان پێ نەدرابوو کە بۆ ناشتنی لە گۆڕستانی شاردا پێویستە. هەر بۆیە دواجار تەرمی ڕۆبینایان بردەوە بۆ گوندێکی مەریوان و لەوێ ئەسپەردەی خاکیان کرد. بەڵام نە لە کرماشان و نە لە مەریوان مۆڵەتی بەڕێوەبردنی ڕێوڕەسمی سەرەخۆشییان پێ نەدرا.

سەجاد فەیزی، لاوی خەڵکی کرماشان، ڕۆژی ١٨ی بەفرانباری ١٤٠٤ (٨ی ژانڤییەی ٢٠٢٦) لە خۆپیشاندانە جەماوەرییەکانی ئەم شارەدا بە دەسڕێژی هێزەکانی سوپای پاسداران کوژرا. تا ئێستە هیچ زانیارییەک لەسەر ڕادەستکردنەوەی تەرمەکەی و بەڕێوەچوونی ڕێوڕەسمی ئەسپەردەکردن بەردەست نەکەوتووە.

محەممەد جەعفەری، لاوی خەڵکی کرماشان، ڕۆژی ١٨ی بەفرانباری ١٤٠٤ (٨ی ژانڤییەی ٢٠٢٦) لە خۆپیشاندانە جەماوەرییەکانی ئەم شارەدا بە دەسڕێژی هێزەکانی سوپای پاسداران کوژرا. تا ئێستە هیچ زانیارییەک لەسەر ڕادەستکردنەوەی تەرمەکەی و بەڕێوەچوونی ڕێوڕەسمی ئەسپەردەکردن بەردەست نەکەوتووە.

عیرفان جامەشۆرانی، لاوی خەڵکی کرماشان، ڕۆژی ١٨ی بەفرانباری ١٤٠٤ (٨ی ژانڤییەی ٢٠٢٦) لە خۆپیشاندانە جەماوەرییەکانی ئەم شارەدا بە دەسڕێژی هێزەکانی سوپای پاسداران کوژرا. تا ئێستە هیچ زانیارییەک لەسەر ڕادەستکردنەوەی تەرمەکەی و بەڕێوەچوونی ڕێوڕەسمی ئەسپەردەکردن بەردەست نەکەوتووە.

بورهان سەیدی، هاووڵاتیی خەڵکی گوندی «یەنگیجە»ی سەڵماس، لە خۆپیشاندانە جەماوەرییەکانی تاراندا بە دەسڕێژی هێزە ئەمنییە کان کوژرا. بنەماڵەکەی تەنها دوای پێبژاردنی یەک میلیارد تمەن پارە مۆڵەتی وەرگرتنەوەی تەرمەکە و بەڕێوەبردنی ڕێوڕەسمی ئەسپەردەکردنیان لە سەڵماس پێ درا.

محەممەد زەمانی، هاووڵاتیی خەڵکی ئەیوانی ئیلام و باوکی دوو منداڵ، ڕۆژی ١٨ی بەفرانباری ١٤٠٤ (٨ی ژانڤییەی ٢٠٢٦) لە خۆپیشاندانە جەماوەرییەکانی تاراندا بە دەسڕێژی هێزە ئەمنییەکان کوژرا و تەرمەکەی بۆ ئەسپەردەکردن ڕادەستی بنەماڵەکەی کرایەوە.

سەلام میرانی، هاووڵاتیی خەڵکی گوندی «چشمیەر»ی سەر بە سەوڵاوای پارێزگای کوردستان و باوکی دوو منداڵ، ڕۆژی ١٨ی بەفرانباری ١٤٠٤ (٨ی ژانڤییەی ٢٠٢٦) لە خۆپیشاندانە جەماوەرییەکانی شاری قودس (قەلعە حەسەنخان)ی تاراندا بە دەسڕێژی هێزە ئەمنییە کان کوژرا و تەرمەکەی بۆ ئەسپەردەکردن ڕادەستی بنەماڵەکەی کرایەوە.

نەوید ساڵحی، ٢٨ ساڵان، دەرچووی بەشی ڕادیۆلۆژی و پەرستاری نەخۆشخانەی فارابیی کرماشان، خەڵکی پاوە و دانیشتووی کرماشان، ڕۆژی ١٨ی بەفرانباری ١٤٠٤ (٨ی ژانڤییەی ٢٠٢٦) لە خۆپیشاندانە جەماوەرییەکانی کرماشاندا بە دەسڕێژی هێزەکانی سوپای پاسداران کوژرا. ڕێوڕەسمی ئەسپەردەکردنی ڕۆژی ٢١ی بەفرانبار (١١ی ژانڤییە) لە گوندی «مەزیری»ی پاوە بەڕێوە چوو.

بەیات سوبحانی، ٤٠ ساڵان، باوکی دوو منداڵ و خەڵکی گوندی «شمشێر»ی پاوە، ڕۆژی ١٨ی بەفرانباری ١٤٠٤ (٨ی ژانڤییەی ٢٠٢٦) لە خۆپیشاندانە جەماوەرییەکانی کرماشاندا بە دەسڕێژی هێزەکانی سوپای پاسداران کوژرا. ڕێوڕەسمی ئەسپەردەکردنی ڕۆژی ٢١ی بەفرانبار (١١ی ژانڤییە) لە گوندی «شمشێر»ی پاوە بەڕێوە چوو.

ئەمیرعەلی حەیدەری، منداڵی ١٧ ساڵان و خەڵکی کرماشان، ڕۆژی ١٨ی بەفرانباری ١٤٠٤ (٨ی ژانڤییەی ٢٠٢٦) لە خۆپیشاندانە جەماوەرییەکانی ئەم شارەدا کەوتە بەر دەسڕێژی هێزەکانی سوپای پاسداران، گوللە بەر دڵی کەوت و دەسبەجێ گیانی بەخت کرد. بنەماڵەکەی پاش ئەوەی تەرمەکەیان لە نوخۆشخانەی تاڵەقانی وەرگرت تێ گەیشتن کە هێزە ئەمنییەکان لە کاتی برینداربوونیدا بە قونداقی تفەنگ کەللەسەریان تەقاندووە. ڕێوڕەسمی ئەسپەردەکردنی ڕۆژی ٢٠ی بەفرانبار (١٠ی ژانڤییە) لە کرماشان بەڕێوە چوو.

دیار پوورچەهریق، ٣٢ ساڵان و خەڵکی گوندی «پتەوێر»ی سەڵماس، لە تاران شۆفێری تەکسیی ئێسنەپ بوو و لە خۆپیشاندانە جەماوەرییەکانی ئەم شارەدا بە دەسڕێژی هێزەکانی سوپای پاسداران بریندار بوو و چووە حاڵەتی کۆماوە. دوای سێ ڕۆژ مانەوە لە نەخۆشخانە بە هۆی سەختبوونی برینەکانیەوە گیانی بەخت کرد. هێزە ئەمنییەکان لەبەر ئەوەی پێشتر لە کاتی سەرهەڵدانی ژن، ژیان، ئازادیدا دەستبەسەر کرابوو، تا ئێستە تەرمەکەیان نەداوەتەوە.

ئیبراهیم ئەحمەدپووریان، باوکی دوو منداڵ، خەڵکی سەقز و دانیشتووی تاران، ڕۆژی ١٨ی بەفرانباری ١٤٠٤ (٨ی ژانڤییەی ٢٠٢٦) لە خۆپیشاندانە جەماوەرییەکانی تاراندا بە دەسڕێژی هێزە ئەمنییەکان بریندار بوو و ڕۆژی دواتر بە هۆی سەختبوونی برینەکانیەوە گیانی بەخت کرد. تا ئێستە هیچ زانیارییەک لەسەر ڕادەستکردنەوەی تەرمەکەی و بەڕێوەچوونی ڕێوڕەسمی ئەسپەردەکردن بەردەست نەکەوتووە.

عەلیڕەزا سەیدی، منداڵی ١٦ ساڵانی خەڵکی ئاودانان و دانیشتووی تاران، ڕۆژی ١٨ی بەفرانباری ١٤٠٤ (٨ی ژانڤییەی ٢٠٢٦) لە خۆپیشاندانە جەماوەرییەکانی تاراندا بە دەسڕێژی هێزە ئەمنییەکان کوژرا. ڕێوڕەسمی ئەسپەردەکردنی ڕۆژی ٢١ی بەفرانبار (١١ی ژانڤییە) بە بەشداریی بەربڵاوی خەڵک و وتنەوەی دروشمی دژ بە حکومەت بەڕێوە چوو. بەڵام هێزە ئەمنییەکان بە چەکی جەنگی دەسڕێژیان لە بەشداربوان کرد.

هولاکۆ ئەیوانی، وەرزشکاری خەڵکی شاباد، ڕۆژی ١٨ی بەفرانباری ١٤٠٤ (٨ی ژانڤییەی ٢٠٢٦) لە خۆپیشاندانە جەماوەرییەکانی ئەم شارەدا بە دەسڕێژی هێزە ئەمنییەکان کوژرا. ڕێوڕەسمی ئەسپەردەکردنی بەڕێوە چووە بەڵام هیچ زانیارییەک لەسەر کات و شوێنەکەی بەردەست نەکەوتووە.

یاسین میرزایی قەلعەزنجیری، هاووڵاتیی یارسان و خوێندکار لە ئیتالیا، ڕۆژی ١٨ی بەفرانباری ١٤٠٤ (٨ی ژانڤییەی ٢٠٢٦) لە خۆپیشاندانە جەماوەرییەکانی گەڕەکی دەرەدرێژی کرماشاندا بە دەسڕێژی هێزە ئەمنییەکان کوژرا. یاسین ماوەیەک پێش ئەوە بە مەبەستی دیداری بنەماڵەکەی لە ئیتالیاوە گەڕابوویەوە بۆ کرماشان، تا ئێستە هیچ زانیارییەک لەسەر ڕادەستکردنەوەی تەرمەکەی و بەڕێوەچوونی ڕێوڕەسمی ئەسپەردەکردن بەردەست نەکەوتووە.

موبین فەیلی، هاووڵاتیی خەڵکی شارۆچکەی زەڕنەی سەر بە شاری ئەیوانی ئیلام، ڕۆژی ١٨ی بەفرانباری ١٤٠٤ (٨ی ژانڤییەی ٢٠٢٦) لە خۆپیشاندانە جەماوەرییەکانی ئەم شارەدا بە دەسڕێژی هێزە ئەمنییەکان کوژرا. تا ئێستە هیچ زانیارییەک لەسەر ڕادەستکردنەوەی تەرمەکەی و بەڕێوەچوونی ڕێوڕەسمی ئەسپەردەکردن بەردەست نەکەوتووە.

ئاکۆ محەممەدی، هاووڵاتیی ٢٢ ساڵانی خەڵکی سەلاسی باوەجانیی کرماشان و دانیشتووی قشم لە باشووری ئێران، ڕۆژی ١٨ی بەفرانباری ١٤٠٤ (٨ی ژانڤییەی ٢٠٢٦) لە خۆپیشاندانە جەماوەرییەکانی ئەم شارەدا بە دەسڕێژی هێزە ئەمنییەکان کوژرا. تا ئێستە هیچ زانیارییەک لەسەر ڕادەستکردنەوەی تەرمەکەی و بەڕێوەچوونی ڕێوڕەسمی ئەسپەردەکردن بەردەست نەکەوتووە.

لە سەرەتای خۆپیشاندانە جەماوەرییەکانەوە تا ئەمڕۆ، سەدان هاووڵاتیی کورد لە شارە جیاوازەکانی پارێزگاکانی ئیلام، کرماشان، لوڕستان، کوردستان، تاران، ئەلبورز و خوراسانی باکوور لە لایەن هێزە ئەمنییەکانەوە دەستبەسەر کراون.

تۆڕی مافەکانی مرۆڤی کوردستان تا ئێستە توانیویەتی ناسنامە و زانیاریی زیاتر لە ٢٥٠ هاووڵاتیی دەستبەسەرکراوی کورد، لەوانە چەندین چالاکوانی مەدەنی، زیندانیی سیاسیی پێشوو، مامۆستای زانکۆ، وەرزشکار و… لە پارێزگاکانی ئیلام، کرماشان، لوڕستان، کوردستان، تاران، ئەلبورز و خوراسانی باکوور تۆمار بکات. بەڵام مەزەندەکان وا نیشان دەدەن ژمارەی ڕاستەقینەی دەستبەسەرکراون زۆر زیاتر لەوەیە. بە هۆی دۆخی تایبەتی ئەمنی و گوشاری دامودەزگا ئەمنییەکانەوە بۆ سەر بنەماڵەکان بە مەبەستی ڕێگریکردن لە بڵاوبوونەوەی زانیاری و هەواڵەکان، نەمانتوانیوە ناونیشان و زانیاریی تەواوی سەرجەم دەستبەسەرکراون بەدەست بهێنین.

ژمارەیەکی بەرچاو لە دەستبەسەرکراوان منداڵان و مێرمنداڵانی خوار ١٨ ساڵن. تۆڕی مافەکانی مرۆڤی کوردستان تا ئێستە تەنها توانیویەتی ناو و زانیاریی ٢٠ منداڵ و مێرمنداڵی دەستبەسەرکراو لە پارێزگاکانی ئیلام، کرماشان و کوردستاندا تۆمار بکات. هاوکات شۆرای هەماهەنگیی ڕێکخراوە پیشەییەکانی مامۆستایانی ئێران ڕایگەیاندووە کە هەرتەنها لە خۆپیشاندانەکانی شاری هەرسینی کرماشاندا لانیکەم ١٠٠ منداڵی قوتابی دەستبەسەر کراون.