ئەمڕۆ سێشەممە ١٥ی ڕەشەمە (٥ی مارس) کامران قاسمی، زیندانیی سیاسیی کورد کە لە زیندانی ناوەندیی ورمێدا سزای ٧ ساڵ و نیو بەندکران تێدەپەڕێنێت، بە مەبەستی ناڕەزایی دەربڕین لە ئاست ڕێگریکردنی بەرپرسانی زیندان و ئیدارەی ئیتلاعاتدا بۆ پێدانی مۆڵەتی پشووی کاتی و ئازادیی مەرجدار، مانی لە خواردن گرت. ئەم زیندانییە سیاسییە دوای ڕاگەیاندنی مانگرتنەکە و بە فەرمانی بەرپرسانی زیندان ڕەوانەی ژووری تاکەکەسی کرا.

بەپێی ئەو زانیاریانەی کەوتووەتە دەست تۆڕی مافەکانی مرۆڤی کوردستان، کامران قاسمی کە لە بەندی سەرووئەمنیی زیندانی ناوەندیی ورمێدایە، سەرەڕای ئەوەی زیاتر لە نیوەی ماوەی سزاکەی تێپەڕاندووە و بەپێی یاسا مافی وەرگرتنی ئازادیی مەرجداری هەیە، بەڵام بە هۆی ناڕەزامەندی و ڕێگریکردنی بەرپرسانی زیندان و ئیدارەی ئیتلاعاتەوە تا ئێستا لە مافی پشووی کاتی و ئازادیی مەرجدار بێبەش کراوە.

کامران قاسمی، هاووڵاتیی خەڵکی ورمێ، لە ڕێکەوتی ١٦ی ڕەزبەری ١٣٩٨ (٨ی ئۆکتۆبەری ٢٠١٩) لەگەڵ ٤ هاووڵاتیی دیکەدا بە ناوەکانی کەیوان ڕەشۆزادە، ئومید سەعیدی، نایب حاجیزادە و عەبدولعەزیز گوڵمحەممەدی لە لایەن هێزە ئەمنییەکانەوە دەستبەسەر و پاشان ڕەوانەی دەستبەسەرگەی ئیدارەی ئیتلاعاتی ورمێ کران و دوای مانگێک لێپرسینەوە گواسترانەوە بۆ بەندی لاوانی زیندانی ناوەندیی ئەم شارە.

دادگای ئەم هاووڵاتییانە دوای ساڵێک مانەوە لە سەرماوەزی ١٣٩٩دا (نۆڤامبەری ٢٠٢٠) لە لقی دووهەمی دادگای شۆڕشی ئیسلامیی ورمێ بەڕێوە چوو و هەر پێنجەکەیان بە تۆمەتی «هەوڵدان بۆ تێکدانی ئاسایشی نیشتمانی» لە ڕێگەی ئەندامێتییەوە لە کۆمەڵەدا، سزای ١٠ ساڵ و ڕۆژێک بەندکرانیان بەسەردا سەپا. سزاکەی کامران قاسمی دوای پێشکەشکردنی داوای قبووڵکردنی بڕیارەکە و بەپێی یاسا گۆڕدرا بۆ ٧ ساڵ و ٦ مانگ بەندکران.

ئەم زیندانییە سیاسییە لە سەرماوەزی ١٣٩٩دا (نۆڤامبەری ٢٠٢٠) لەگەڵ ئومید سەعیدی و کەیوان ڕەشۆزادەدا و وەک ناڕەزایەتییەک لە ئاست نادیاربوونی چارەنووسیان و گوشارەکانی نووسینگەی تایبەتی ئیدارەی ئیتلاعات و جێبەجێنەکردنی یاسای جیاکردنەوەی زیندانیان لە بەندی لاوانی زیندانی ناوەندیی ورمێدا، بۆ ماوەی حەفتەیەک مانیان لە خواردن گرت.

هەروەها ڕۆژی ٥ی پووشپەڕی ١٤٠٠ (٢٦ی ژوەنی ٢٠٢١) بنەماڵەی کامران قاسمی لە کاتی دیدارکردندا لە لایەن هێزەکانی زیندانەوە بێڕێزی و سووکایەتییان پێ کرا و ئەمەش بووە هۆی ناڕەزایی و دەنگهەڵبڕینی ئەم زیندانییە سیاسییە، بەڵام هێزەکانی گاردی زیندان لە بەرچاوی بنەماڵەکەیدا پەلامار و ئەشکەنجەیان دا.