پەناخوازان ئارشیڤ – KHRN

ئه‌یلول 12, 2023

ئەمیر کەهریزی، پەناخوازی سیاسیی کورد، لە کەمپی شاری ئاگریی تورکیا مانی لە خواردن گرت

ئەمیر کەهریزی، پەناخوازی سیاسیی خەڵکی کرماشان کە لە ڕەکەوتی ٣ی خەرمانانەوە لە کەمپی شاری ئەدێرنەی تورکیاوە گوازراوەتەوە بۆ کەمپێک لە شاری ئاگری لە سنووری ئێران و تورکیادا، وەک ناڕەزایەتییەک لە ئاست مەترسیی دیپۆرتکردنەوەیدا بۆ ئێران، لە ڕۆژی ١٨ی خەرمانانەوە (٩ی سێپتامبەر) مانی لە خواردن گرتووە. شەهلا چورکە، هاوژینی ئەم پەناخوازە سیاسییە، لە وتووێژ لەگەڵ تۆڕی مافەکانی مرۆڤی کوردستاندا ڕایگەیاند کە هاوژینەکەی ڕۆژی ڕابردوو لە پێوەندییەکی…

زیاتر
ئاب 25, 2023

مەترسیی گەڕاندنەوەی زۆرەملێی بیست پەناخوازی سیاسی لە تورکیاوە بۆ ئێران

سەرلەبەیانیی ئەمڕۆ هەینی ٣ی خەرمانان (٢٥ی ئاگۆست) بە دەستووری بەرپرسانی کامپی ئەدێرنە، لانیکەم ٢٠ پەناخوازی سیاسیی ئێرانی و ئەفغانستانی بە مەبەستی گەڕاندنەوەی زۆرەملێ بۆ ئێران (دیپۆرتکردنەوە) گوازراونەتەوە بۆ شوێنێکی نادیار. شەهلا چورکە، هاوسەری ئەمیر کەهریزی کە یەکێکە لەم پەناخوازانە، لە وتووێژ لەگەڵ تۆڕی مافەکانی مرۆڤی کوردستاندا وتی: «سەرلەبەیانیی ئەمڕۆ هاوسەرەکەم لە پێوەندییەکی کورتی تەلەفۆنیدا پێی وتم کە لانیکەم ٢٠ پەناخوازی سیاسیی ئێرانی و ئەفغانستانی…

زیاتر
ئایار 27, 2023

گەڕاندنەوەی زۆرەملێی سی پەناخواز لە تورکیاوە بۆ ئێران / مەترسیی سنوورداشکردنەوەی پەناخوازێکی تر

ئەمیر کەهریزی، چالاکی سیاسیی کوردی خەڵکی کرماشان کە لە ڕێکەوتی ١٧ی گوڵاندا (٧ی مەی) لە ڕێگای کۆچکردندا بەرەو ئەورووپا لە لایەن پۆلیسی یۆنانەوە دەستبەسەر و ڕادەستی تورکیا کرایەوە، لە کامپی سنوورداشکردنەوی پەناخوازان لە شاری ئەدێرنەی تورکیادایە و مەترسیی گەڕاندنەوەی بۆ ئێران لە ئارادایە. ڕۆژی پێنجشەممە ٤ی جۆزەردان (٢٥ی مەی) لانیکەم ٣٠ پەناخوازی ئێرانیی دیکە دوای لێدان و ئەشکەنجەدران لە لایەن پۆلیسی تورکیاوە سنوورداشی ئێران کرانەوە….

زیاتر
ئازار 31, 2022

ده‌ركردنی توندو تیژكارانه‌ ژنه‌ په‌ناخوازێكی كوردی ئێرانی له‌ دانمارك

تۆڕی مافه‌كانی مرۆڤی كوردستان زانیاریی بەدەست هێناوە کە ڕۆژی سێشەممە ٩ی خاکەلێوە (٢٩ی مارس) ژنە پەناخوازێکی کوردی ئێرانی بە ناوی قەدەمخێر حەقانیزادە دوای ٦ ساڵ نیشتەجێبوون لە دانمارک لەبەر ئەوەی داوای پەنابەرییەکەی ڕەت کراوەتەوە، لە لایەن هێزە دەوڵەتییەکانی ئەو وڵاتەوە بە شێوەیەکی توندوتیژکارانە لە هاوسەر و منداڵە یەک ساڵەکەی جیا کراوەتەوە و لەگەڵ دوو منداڵەکەی تریدا براونەتە فڕۆکەخانەی کۆپنهاگ. ئەم پەناخوازە لەگەڵ دوو منداڵە ١٠…

زیاتر
ئازار 24, 2022

په‌ناخوازێكی سیاسیی كورد له‌ نه‌مسا به‌ دوورینه‌وه‌ لێوه‌كانی مانگی له‌ خواردن گرت

تۆڕی مافەکانی مرۆڤی کوردستان زانیاریی بەدەست هێناوە کە ڕۆژی چوارشەممە ٣ی خاکەلێوە (٢٣ی مارس) کامران دەروێشی، زیندانیی سیاسیی پێشوو کە لە نزیکەی ١١ مانگ لەمەوپێشەوە لە وڵاتی نەمسا(ئۆتریش) داوای پەنابەریی کردووە، بە مەبەستی دەربڕینی ناڕەزایی لە ئاست یەکلایینەکردنەوەی دوسیەکەی و بڕیاری بەرپرسانی شوێنی نیشتەجێبوونی بۆ دەرکردنی لە بیناکە، بە دوورینەوەی لێوەکانی مانی لە خواردن گرتووە. کامران دەروێشی پێشتریش لە کاتی بەندبوون لە زیندانی ورمێ، بە…

زیاتر
كانونی دووه‌م 14, 2022

خنکانی دوو هاوژینی پەناخواز لە ئاوەکانی یۆناندا

ڕۆژی پێنجشەممە ٢٣ی بەفرانبار کچ و کوڕێکی هاوژینی خەڵکی مەریوان بە ناوەکانی جەلیل ڕەوانگەرد و سومەییە جامخانە لە ڕێگای پەڕینەوەدا بۆ ئەورووپا لە ئاوەکانی یۆناندا خنکاون.تۆڕی مافەکانی مرۆڤی کوردستان زانیاریی بەدەست هێناوە کە سومەییە جامخانە ٢٨ ساڵان لەگەڵ هاوژینەکەیدا جەلیل ڕەوانگەرد ٣٤ ساڵان و هەروەها براکەی عەبدوڵڵا جامخانە ١٥ ساڵان، ڕۆژی پێنجشەممە ٢٣ی بەفرانبار لە ڕێگای پەڕینەوەدا بۆ ئەورووپا لە ڕووبارێکی یۆناندا خنکاون. عەبدوڵڵا جامخانەیش…

زیاتر
كانونی دووه‌م 5, 2022

مەرگی گوماناویی چالاکێکی سیاسیی کوردی هاووڵاتیی ئێران لە هەرێمی کوردستان

لە ڕێکەوتی شەممە ١١ی بەفرانباردا تەرمی چالاکێکی سیاسیی کوردی هاووڵاتیی ئێران بە ناوی ئەحمەد بێغەم لە ماڵەکەی خۆی لە شاری هەولێری هەرێمی کوردستان لە لایەن یەک لە هاوڕێکانیەوە دۆزرایەوە. نزیکانی ئەحمەد بێغەم دەڵێن ئاسەواری ئەشکەنجە لەسەر جەستەی ناوبراو بووە و مەرگەکەی بە گوماناوی لە قەڵەم دەدەن. پۆلیسی هەولێر تا ئێستا هیچ لێدوانێکی فەرمیی لەسەر ئەم بابەتە نەداوە و ئەنجامی پشکنینی پزیشکیی دادیش لە ٢٠ ڕۆژی…

زیاتر
كانونی یه‌كه‌م 16, 2021

بنەماڵەی ٩ پەناخوازی کورد لە بەردەم باڵیۆزخانەی تورکیا لە تاران کۆ بوونەوە

بنەماڵەی ٩ پەناخوازی کورد بە ناوەکانی دەماوەند پاک سرشت، موبین وەلەدبەیگی، ئەفشار ڕوستەمی، بەهمەن شادڕەوان، مەسعوود حەیدەری، سەعید ئەحمەدی، فەردین دەروێشپوور، هیدایەت ڕوخزادی و سامرەند خزربوور بۆ دووهەم ڕۆژی بەردەوام لە بەردەم باڵیۆزخانەی تورکیا لە تاران کۆ بوونەوە. ئەم پەناخوازە کوردانە ١١٦ ڕۆژ لەمەوپێش دوابەدوای دەستبەسەرکران لە لایەن پۆلیسی تورکیاوە و ڕادەستکردنیان بە هێزەکانی ئەرتەشی ئازادی سووریا، لە زیندانێکدا لە سووریا بەند کراون. تا ئێستا بەرپرسانی…

زیاتر

بڵاوکراوەکان

ڕاپۆرتی مانگانەی دۆخی مافەکانی مرۆڤ ــ خەرمانانی ١٤٠٢ (ئاگۆست و سێپتامبەری ٢٠٢٣)

تۆڕی مافەکانی مرۆڤی کوردستان لە ڕاپۆرتی مانگانەی خۆیدا ئاوڕ لە حاڵەتەکانی پێشێلکردنی مافەکانی مرۆڤ لە کوردستان و پێشێلکردنی مافی هاووڵاتیانی کورد لە ناوچە و…

هەوڵی حکومەت بۆ شاردنەوەی تاوان؛ ڕاپۆرتێک لەسەر ڕەوتی لێکۆڵینەوە لە دۆسیەی کوشتنی حکومەتیی ژینا ئەمینی

ژینا ئەمینی، لەدایکبووی ٣٠ی خەرمانانی ١٣٧٩ (٢٠ی سێپتامبەری ٢٠٠٠) لە شاری سەقز، لە کاتی گیانلەدەستداندا تەنها ٢٢ ساڵی تەمەن بوو. ژینا ڕۆژی ٢٢ی خەرمانانی…

ڕاپۆرتێکی توێژینەوەیی سەبارەت بە تاوانەکانی کۆماری ئیسلامی لە شاری جوانڕۆدا؛ ئاگری شەڕی دەسەڵات لە سەر دەستە بەتاڵەکان و سەنگەرەکانی ڕقی گەل

لە سەروبەندی ساڵڕۆژی دەسپێکردنی سەرهەڵدانی شۆڕشگێڕانەی ژن، ژیان، ئازادیدا، ڕاپۆرتێکی نوێی تۆڕی مافەکانی مرۆڤی کوردستان و کەمپەینی مافەکانی مرۆڤ لە ئێراندا لەژێر ناوی «جوانڕۆ؛…

ڕاپۆرتی پێشێلکردنی مافەکانی مرۆڤ لە مانگی گەلاوێژی ١٤٠٢دا (جولای و ئاگۆستی ٢٠٢٣)

بەپێی ئامارە کۆکراوەکانی تۆڕی مافەکانی مرۆڤی کوردستان، لە مانگی گەلاوێژی ١٤٠٢دا (جولای و ئاگۆستی ٢٠٢٣) ـ لەم مانگە و لە درێژەی شەپۆلی نوێی دەستبەسەرکردنی…

ڕاپۆرتی پێشێلکردنی مافەکانی مرۆڤ لە کوردستان لە مانگی پووشپەڕی ١٤٠٢دا (ژوەن و جولای ٢٠٢٣)

بەپێی ئامارە کۆکراوەکانی تۆڕی مافەکانی مرۆڤی کوردستان، لە مانگی پووشپەڕی ١٤٠٢دا (ژوەن و جولای ٢٠٢٣) ـ لانیکەم ٥٤ هاووڵاتی و چالاکی کورد لە شارە…

ڕاپۆرتی پێشێلکردنی مافەکانی مرۆڤ لە کوردستان لە مانگی جۆزەردانی ١٤٠٢دا (مەی و ژوەنی ٢٠٢٣)

بەپێی ئامارە کۆکراوەکانی تۆڕی مافەکانی مرۆڤی کوردستان، لە مانگی جۆزەردانی ١٤٠٢دا (مەی و ژوەنی ٢٠٢٣) ـ لانیکەم ٧٠ هاووڵاتی و لەوانە بنەماڵەی دادخوازان و…

بەردەوامبوونی گوشاری سەر زیندانیانی سیاسیی کوردی زیندانی ورمێ لە لایەن دامودەزگا ئەمنییەکان و داواکاری گشتیی ئەم شارەوە

لە درێژەی گوشارەکانی سەر زیندانیانی سیاسیی زیندانی ناوەندیی ورمێدا، ژمارەیەک لە ئەندامانی بنەماڵەی ئەم زیندانیانە بانگهێشتی بەردەم بنکەی هەواڵگریی ئیدارەی ئیتلاعات کراون و خراونەتە…

ڕاپۆرتی ساڵانەی دۆخی مافەکانی مرۆڤ لە کوردستان لە ساڵی ١٤٠١دا

(٢١ی مارسی ٢٠٢٢ تا ٢١ی مارسی ٢٠٢٣) لەم ڕاپۆرتەدا ئاوڕ دەدرێتەوە لە حاڵەتەکانی پێشێلکردنی مافەکانی مرۆڤی هاووڵاتییانی کورد لە ئێران لە ساڵی ١٤٠١دا. لەم…

ڕاپۆرتی پێشێلکردنی مافەکانی مرۆڤ لە کوردستان لە مانگی خاکەلێوەی ١٤٠٢دا (مارس و ئاوریلی ٢٠٢٣)

بەپێی ئامارە کۆکراوەکانی تۆڕی مافەکانی مرۆڤی کوردستان لە مانگی خاکەلێوەی ١٤٠٢دا (مارس و ئاوریلی ٢٠٢٣): ـ لانیکەم ١٤ هاووڵاتی و چالاکی کورد لە شارە…

ڕاپۆرتێک لەسەر دوایین دۆخی پووریا جەواهێری، هاووڵاتیی تۆمەتبار بە «موحارەبە» لە زیندانی کامێران

پووریا جەواهێری، هاووڵاتیی خەڵکی کامێران کە لە ڕێکەوتی ٨ی سەرماوەزی ١٤٠١دا (٢٩ی نۆڤامبری ٢٠٢٢) دوای بانگهێشتکران بۆ بنکەی هەواڵگریی دەزگای ئیتلاعاتی سپای پاسدارانی ئەم…

ڕاپۆرتێک لەسەر بارودۆخی منداڵێکی خەڵکی پیرانشار کە بە تەقەی هێزە چەکدارەکان بینایی چاوێکی لەدەست داوە

زانیار (مەتین) توندەر، منداڵە خوێندەوانێکی ١٧ ساڵانی خەڵکی پیرانشار کە هێزە سەربازی-ئەمنییەکان لە خۆپیشاندانە جەماوەرییەکانی ئەم شارە لە گەڵاڕێزانی ١٤٠١دا (نۆڤامبری ٢٠٢٢) بە ساچمەزەن…

ڕاپۆرتی مانگانەی دۆخی مافەکانی مرۆڤ ــ خەرمانانی ١٤٠٢ (ئاگۆست و سێپتامبەری ٢٠٢٣)

تۆڕی مافەکانی مرۆڤی کوردستان لە ڕاپۆرتی مانگانەی خۆیدا ئاوڕ لە حاڵەتەکانی پێشێلکردنی مافەکانی مرۆڤ لە کوردستان و پێشێلکردنی مافی هاووڵاتیانی کورد لە ناوچە و شارەکانی ئێران لە یەک مانگی ڕابردوودا دەداتەوە. بە هۆی قەدەغەبوونی چالاکیی ڕێکخراوە سەربەخۆکانی مافی مرۆڤەوە لە ئێراندا و گوشاری سەر بنەماڵەی قوربانیانی پێشێلکردنی مافەکانی مرۆڤ، ئامادەکردنی ڕاپۆرتی بەڵگەدار و ورد ڕووبەڕووی گرفتی فراوان دەبێتەوە. هەر بۆیە ئامار و زانیارییەکانی ناو ئەم ڕاپۆرتە سەرجەم حاڵەتەکانی پێشێلکردنی مافەکانی مرۆڤ ناگرێتەوە. ئەم ڕاپۆرتە لەسەر بنەمای هەواڵ و ڕاپۆرتەکانی تۆڕی مافەکانی مرۆڤی کوردستان و هەروەها لێکۆڵینەوە و پشتڕاستکردنەوەی ڕاپۆرت و هەواڵی ڕێکخراوە و ماڵپەڕە چالاکەکانی تر لەم بوارەدا ئامادە کراوە.

مانگی خەرمانانی ١٤٠٢ هاوکات بوو لەگەڵ یەکەم ساڵڕۆژی کوشتنی حکومەتیی ژینا ئەمینی و دەسپێکردنی سەرهەڵدانی ژن، ژیان، ئازادیدا. لە سەرەتای مانگی خەرمانانەوە کۆماری ئیسلامیی ئێران بە مەبەستی ڕێگریکردن لە سەرهەڵدانەوەی خۆپیشاندانە جەماوەرییەکان و بەڕێوەچوونی ڕێوڕەسمی ساڵیادی گیانبەختکردوان لە شارە جیاوازەکانی کوردستاندا، دەستی دایە ڕەوانەکردنی بەربڵاوی هێزە سەربازی-ئەمنییەکانی خۆی بۆ ئەم شارانە.

هاوکات زیاتر لە ٥٠٠ هاووڵاتی و چالاکی کورد لە لایەن دەزگای ئیتلاعاتی سوپای پاسداران و ئیدارەی ئیتلاعات و پۆلیسی ئەمنییەتی شارە جیاوازەکانەوە، بانگهێشت و هەڕەشەیان لێ کرا کە بە هیچ شێوەیەک بۆیان نییە لە ڕێوڕەسمی ساڵیادی گیانبەختکردوان و هەرچەشنە خۆپیشاندان و گردبوونەوەیەکی جەماوەریدا بەشداری بکەن.

دامودەزگا ئەمنییەکان لە ڕێگای گوشار، بانگهێشتی تەلەفۆنی و هەڕەشەکردنەوە لە بنەماڵەی گیانبەختکردوان، نەیانهێشت ڕێوڕەسمی ساڵیادی گیانبەختکردوان بەڕێوە بچێت و تا ئێستا لەسەر چارەنووسی ژمارەیەک لە ئەندامانی بنەماڵەی دادخوازان کە لەم مانگەدا لە لایەن هێزە ئەمنییەکانەوە دەستبەسەر کراون، هیچ زانیارییەک بەردەست نەکەوتووە.

هێزە سەربازی-ئەمنییەکان لە ڕێگای گەمارۆدانی گۆڕستانی شارە جیاوازەکانەوە ڕێگەکانیان داخست و نەیانهێشت بنەماڵەی گیانبەختکردوان سەردانی مەزاری ئازیزەکانیان بکەن و ئەم سنوور و تەگەرانە و جێگیرکردنی هێزە ئەمنییەکان تا ئێستایش هەر بەردەوامە.

ڕۆژی ٢٥ی خەرمانان (١٦ی سێپتامبەر) هاوکات لەگەڵ ساڵڕۆژی کوشتنی حکومەتیی ژینا ئەمینیدا، هێزەکانی یەکەی تایبەت و سوپای پاسداران کە لە شەقامەکانی زیاتر لە ١٥ شاری کوردستاندا جێگیر کرابوون، ڕێگرییان لە بەڕێوەچوونی ڕێوڕەسمی ساڵیادی ژینا و گیانبەختکردوانی تر کرد. ئەم هێزانە ئەمجەد ئەمینیی باوکی ژینایان بۆ ماوەی چەندین کاتژمێر دەستبەسەر کرد و تا ئێستایش هێزە ئەمنییەکان لە شەقامی نزیک ماڵی ژینادا ماونەتەوە و گۆڕستانی ئایچییش هێشتا هەر لە گەمارۆی زرێپۆشەکانی سوپای پاسداراندایە. ئەمە لە حاڵێکدایە کە ڕۆژی ٧ی خەرمانان (١٩ی ئاگۆست) یەکەم کۆبوونەوەی دادگاییکردنی ساڵح نیکبەخت، پارێزەری بنەماڵەی ژینا، بە تۆمەتی «بانگەشەی دژ بە حکومەت» لە لقی ٢٨ی دادگای شۆڕشی ئیسلامیی تاراندا بەڕێوە چوو.

ڕۆژی ٢٥ی خەرمانان (١٦ی سێپتامبەر) هاووڵاتییەک بە ناوی فەردین جەعفەری کە خاوەن پێداویستیی تایبەتە، لە نزیک گۆڕستانی ئایچیی شاری سەقزدا کەوتە بەر دەسڕێژی هێزەکانی سوپای پاسدارانەوە و لەو کاتەوە لە حاڵەتی کۆمادایە. هەروەها لانیکەم دوو هاووڵاتیی دیکەیش لە شارەکانی سنە و مەهاباد هەر لەم ڕۆژەدا بە دەسڕێژی هێزە سەربازی-ئەمنییەکان بریندار بوون و ژمارەیەک هاووڵاتیی دیکەیش دەستبەسەر کران.

بەپێی ئامارە کۆکراوەکانی تۆڕی مافەکانی مرۆڤی کوردستان، لە خەرمانانی ١٤٠٢دا (ئاگۆست و سێپتامبەری ٢٠٢٣):

ـ لە درێژەی شەپۆلی نوێی دەستبەسەرکردنی هاووڵاتیان و چالاکانی کورد لە سەروبەندی ساڵڕۆژی کوشتنی حکومەتیی ژینا ئەمینی و سەرهەڵدانی ژن، ژیان، ئازادیدا، لانیکەم ١٦٢ هاووڵاتی و چالاکی کورد لە شارە جیاوازەکانی پارێزگاکانی ئازەربایجانی ڕۆژئاوا، کوردستان، کرماشان، ئیلام و تاران، بە تۆمەتی سیاسی لە لایەن هێزە ئەمنییەکانەوە دەستبەسەر کراون. لە نێو دەستبەسەرکراوانی ئەم مانگەدا ٦ کەسیان بە مەبەستی جێبەجێکردنی سزای بەندکران دەستبەسەر و ڕەوانەی زیندان کراون. هەروەها ١٤ هاووڵاتیی دەستبەسەرکراویش لەم ماوەیەدا ئازاد کراون، بەڵام ئەوانی دیکە هێشتا هەر دەستبەسەرن یاخود هیچ زانیارییەک لەسەر چارەنووسیان لە بەردەستدا نییە.

ـ لانیکەم ١٩ هاووڵاتی و چالاکی مەدەنی لە لایەن دادگاکانی شۆڕشی ئیسلامی و گشتیی شارەکانی سەقز، سنە، پیرانشار و مەهابادەوە سزای بەندکرانیان بەسەردا سەپاوە.

ـ لانیکەم ٤ بەندکراوی کورد کە بە تۆمەتی «کوشتنی بەئەنقەست» یان تۆمەتی پێوەندیدار بە «مادە هۆشبەرەکان»ـەوە سزای لەسێدارەدانیان بۆ دەرچووبوو، لە زیندانەکانی قزلحەساری کەرەج و سەقز لە سێدارە دران.

ـ کاسبکارێکی کوردی خەڵکی جوانڕۆ بە ناوی پوویا بابایی کە لە لایەن هێزەکانی پۆلیسی ئینتیزامییەوە بە گومانی هەڵگرتنی کاڵای قاچاخ دەستبەسەر کرابوو، لەژێر ئەشکەنجەی ئەم هێزانە لە دەستبەسەرگەیەکی پۆلیسی شاری کرماشاندا گیانی لە دەست دا.

ـ هاووڵاتییەکی خەڵکی شاباد (ئیسلامئاوای ڕۆژئاوا) بە ناوی حامید باقری لە گوڵشاری کەرەجی ناوەندی پارێزگای ئەلبورز بە دەسڕێژەی هێزەکانی پۆلیسی ئینتیزامی کوژرا.

ـ لانیکەم ٦ کۆڵبەری کورد بە دەسڕێژی هێزە سنوورپارێزەکانی کۆماری ئیسلامیی ئێران لە ناوچە سنوورییەکانی بانە، سەردەشت و چاڵدێران بریندار بوون.

ـ لانیکەم دوو ژن لە شارەکانی ڕوانسەر و سەرپێڵی زەهاو بە دەستی ئەندامانی بنەماڵەکانیان کوژران.

ـ لانیکەم ٦ کرێکاری کورد لە شارەکانی سنە، پیرانشار، بانە، بۆکان و مەهاباد بە ڕووداوی کار گیانیان لە دەست دا.

بۆ بینینی وردەکاری و خشتەی پێشێلکارییەکان بە زمانی فارسی ئەم بەستەرە ببینە:

https://kurdistanhumanrights.org/fa/publications-fa/monthly-reports-fa/2023/09/24/p29647/