ئێل جی بی تی* و کوئیرەکان بەشێکن لە کۆمەڵگای کوردستان کە جگە لە جیاکارییە نەتەوەیی، مەزهەبی و چینایەتییەکان، جیاکارییەکی دیکەش بەهۆی مەیلی ڕەگەزی و شوناسی جێندەری لە دژیان ڕوودەدات. ئەو جیاکارییە لەلایەن دەسەڵات و لە ڕێگەی نەریتی کۆمەڵگا و تەنانەت بنەماڵەکانیشەوە بەسەریاندا دەسەپێندرێت.
ئیمه وەک تۆڕی مافه‌كانی مرۆڤی كوردستان کە ڕاگەیاندن، بەبەڵگەکردنی پێشێلکارییەکان، فێرکاری و بڵاوکردنەوەی ڕێسا و چەمکەکانی مافی مرۆڤ بە ئامانجی خۆمان دەزانین، پاراستنی مافی کوئیرەکانی کۆمەڵگای کردستانیش بە یەک لە ئەرکەکانمان دادەنێین.
هەر بۆیە بەشێک لە ماڵپەڕی تۆڕی مافەکانی مرۆڤی کوردستانمان بۆ ئەو مەبەستە تەرخان کردووە و وەک یەکەمین بابەت لەو بارەیەدا دەقێکی کوردیی خوارین لە نووسینی “پانتووس بێستوون”، پەنابەری هاوڕەگەزخوازی کوردی دانیشتووی تورکیا بڵاودەکەینەوە کە خۆی بەتایبەت بۆ ئێمەی ناردووە.
منیش ئەڕای خوەم ئازارێگ دیرم!
نووسینی: پاتنووس بێستوون
وە کام زوان بویشم کە منیش خەڵک ئی وڵاتمە. وە کام زوان بویشم سەنگینی ئی زام و زووخەیلە دڵ و گیان منیشی تەنیە. شووڕاوەی ژان و ڕەنجەیل ئی سەرزەمینە لە سەر شان منیشە!
منیش جوور ئیوە کوشیامه، جوور ئیوە ڕەنج کیشامە، جوور ئیوە ترسیامە و جوور ئیوە زوڵم و ستەم وە پیم کریاس. هاوڕێیەگم، براگەم، هاو نیشتمانیەگەم من برا و کەس و کار تونم. هاو وەتەن و هاوسووز و هاودەرد خەمەگان تونم!
منیش ئەڕا خوەم ئازارێگ دیرم!!
هاوڕییەگەم منیش ژان بیکەسی و بی مافی و بی لانەیی پشتم شکاندیە. منیش وەگەرد هوورەی پڕ لە سووز هورەچڕەیل ئەسر ڕژاندمە و وەگەرد هەڵپەرگێ سەرکەفتنگانمان هەڵپەڕیمە و وەگەرد زکر و سەڵاتەگانتان دەنگ هەڵبڕیمە و ڕاز و نیاز کردمە. ڕەفیقگەم منیش خەڵک ئی سەرزەمین، ئی شار و ئی دیهاتمە. بنووڕە وە سیمای لێوالێو لە ئازار و ڕەنجم! ئیمەیش دەنگ و تەقەی تفەنگەیل بیگانە لە گووشمانە و مێلودی و خەیاڵ مناڵیمان شێواندیە. زامەگانمان ناسوورن، دەنگمان کپیاس و خەیاڵەگانمان لێویاس. بەڵام جیا لەم ئازار و دەردەیلە، ئازارێگ قویلتریش لە سەر شانمان سەنگینی کەید. ئەویش ئازار هاوڕەگەزخواز بین، ئینتر سێکس بین و تڕەنسێکشواڵ بوینمانە.
ڕەفیقەگەم منیش فرەیک شەوەیل ئەڕا بێوڵاتی و بێ لانەیی و تەنیایمان گریامە و ئارزووه کوشیایەگانم شماردمە. هەر شەوە وەگەرد تەنیایەگانم زووران گردمە و وە زەوی کەفتمە. نەیشتیدان لە نیشتمان داگیر کریای خوەمان دانیشمن و ئاوارەی وڵات و سەرزەمین غوربتمان کردیدان. نەیشتیدان هاوغەم زامەکانتان بیمن و بیستوین بیستوین زامتان لە سەر زامەگانمان نیا. نمەکتان کردە بان برینگانمان و ویڵ و ئاوارەی غوربەتمان کردین. وە چە تاوان و جورمێگ، وە تاوان چشتێگ کە وە دەس ئیمە نەوی و لە دروسبوینیا هیچ دەسێگمان نەوی.
دی توان وە چە بڕەسن؟! توان چە لە بەین بوەن.. توان کێ نابوود بکەن؟! هاووڵاتیەگەم ئشتبا کەی! مه دوشمن تونیم. تو کە زوورت ڕەسد هەڵسە و چنگ لە چنگی داگیرکەرەیل وڵاتگەت بخە، هەڵسە و نیشتمانە ئاسمیلەکریاگەم بۆ ئەڵگەڕنەوە. هەڵسە دەس داگیرکەر لە ئی سەرەزمینمە کووتا بکە.
هاونیشتمانی ئیمەی پەلکەزێڕینە و ئنسانەیل مافخواز دوشمن ئیوه نیمن، ئیمە ئەڵگر ڕەنج و دەرد و ئازارەیل خوەمانین. وە تەنیا لە وەرانوەر فەرهەنگێک وسایمن کە تواد نابوودمان بکات و بمانکوشێد.
وە تەنیایی توانیمن بگردیمن وەتەنیایی توانیمن سەفەر بکەیمەن و تەنیایی توانیمن بخەنیمن بەڵام بەڕاستی سەختە وە تەنیایی تەنیایی تەحەموڵ بکەیمن و دەنگمان دەرنایدن. سەختە وە تەنیایی ئی هەمگە بێ ئهترامی و دەرد و زووخە وە بان شانت بی و داڵگ و باوگ و برا و خوەیشک خوەدیش دوشمن بوودن.
ژان ئێڵ جی بیتی بین، هاوڕەگەزخواز بین، ئینترسێکس و ترەنسێکشوال بین لە لایێگ ژانی کورد بینیش وەگەرد خوەمان کیشیمن.
ڕوی قسیەی من وە داڵگ و باوگەیل، برا و خوەیشگەیل کوردەواری و ناوچەیل زاگرۆسە، ئەوە ئەڕا وەختی باسی فارسی قسیە کردن و نابوود کردن زوان و فەرهەنگ داڵگیمان تیەد ئیوە بوینە ڕووشنبیر و پۆزی باکڵاس و باسوادی دەن، ولی کە باس ڕەسەد وە پەلکەزێڕینە و کوومەڵگای ئێڵ جی بی تی بەشیان بوودە کوشتن و بڕین و شاروەدەر و دەروەدەر کردن؟ ئەڕا، ئەڕای خزمەت وە داگیرکەر و نابوودی خوەدان ئازان، وەلی وەختی قسیە لە خاک و نیشتمان و ماف کەمینە جنسیەکان و ژنەیل کەن بیدەنگ بوین و چشتێ نیەوشن؟! ئەڕا ئەڕای کوشتن تڕەنسێکشواڵ و هاوڕەگەزخوازەیل کە ڕووڵەیل خوەدانن زرەنگن، وەلی ئیجازە دەن هێز بیگانە و داگیرکەر ماڵ و مناڵ و خاک و سەرزەمینتان داگیر و تاڵان کەن؟!
ئیانە ڕووڵەیل ئیوەن لە شەقام و خیاوانەگان ئیلام و کرماشان و خوڕەم ئاباد کەفتنە بەر شەق و سووکایەتی وە پیان کرێت.
ئیانە ڕووڵەیل ئیوەن لە وڵاتەیل غەریب هانە ژیر پالەقەی پۆلیس و جەندرەمە تورک و ئاوارەی شارەیل تورکیە و سربستان بوینە و وەشوون پەناگایێگ گەڕن تیای بحەسن. ئیوە وەگەرد کێ شەڕ کەن، تواشای دەوروەر خودان کەن، وە هەڵە چیدن! یانە دوشمەنەیل ئیوە نین، یانە داگیرکەر نین، چەوتان واز بکەن و دوشمەن حەقیقی و ڕاستەقینەی خوەدان بوینن.
چەوتان واز بکەن و بێ هوڤیتی و لەت لەت بین وڵاتەگەتان بوینن. چەوتان واز بکەن و معتادەیل گووشەی خیاوانەگان کرماشان و ئیلام و ئورومیە بوینن لە خودان سوئاڵ بکەن ئەڕا دوشمن ڕاستەقینەمان ون کردیمنە. ئیمە دوشمن ئیوە نیمن، ئیمەیش ئەڕا خوەمان ژان و ئازار و ئەڕا وڵاتەگەمانیش خولیا و ئاواتێگ دیریمن.
