بەپێی ئەو زانیارییانەی کەوتۆتە دەست تۆڕی مافەکانی مرۆڤی کوردستان، بەرەبەیانی ئەمڕۆ پێنجشەممە ٢٧ی ڕێبەندان (١٦ی فێبرییە) سزای لەسێدارەدانی زیندانییەک بە ناوی حەسەن تەیران کە پێشتر بە تۆمەتی «کوشتنی بەئەنقەست» سزای لەسێدارەدانی بۆ دەرچووبوو، لە زیندانی ناوەندیی ورمێ جێبەجێ کراوە.
ئەم زیندانییە ڕۆژی سێشەممە ٢٥ی ڕێبەندان (١٤ی فێبرییە) لەگەڵ بەندکراوێکی مەحکووم بە ئێعدامی دیکەدا بە ناوی ئەفشین ئەمینخانی بە مەبەستی جێبەجێکردنی حوکمەکانیان ڕەوانەی ژووری تاکەکەسی کرابوون.
سزای لەسێدارەدانی ئەفشین ئەمینخانی بە هۆی وەرگرتنی ڕەزایەتی بنەماڵەی کوژراوەکەوە ڕاگیراوە.
حەسەن تەیران، ٤٣ ساڵان، خەڵکی سەڵماس و ئەفشین ئەمینخانی، ٣٠ ساڵان و خەڵکی ورمێ، لە ساڵەکانی ١٣٩٩ و ١٤٠٠دا (٢٠٢١ و ٢٠٢٢) بە تۆمەتی «کوشتنی بەئەنقەست» دەستبەسەر کران و سزای لەسێدارەدان (قەساسی نەفس)یان بۆ دەرچوو.
