به‌پێی زانیارییه‌كانی تۆری مافه‌كانی مرۆڤی كوردستان، چوار ژنی به‌ندكراو به‌ ناوه‌كانی مۆحێبه‌ت مه‌حموودی، فاتمه‌ میرابی، سیمین سه‌یدی و دنیا پیری، له‌ ڕۆژانی ڕابردوودا تووشی ڤایرۆسی كۆرۆنا بوون و به‌ بێ ئەوەی هیچ پێڕاگه‌شتنێکی پزیشكییان بۆ دابین بکرێت، بۆ ‌یه‌كێك له‌ ژووره‌كانی به‌ندی ژنانی به‌ندیخانه‌ی ناوه‌ندیی ورمێوە گواستراونەتەوە.
تۆڕی مافه‌كانی مرۆڤی كوردستان ڕۆژی ڕابردوو هه‌واڵێكی سه‌باره‌ت به ‌ته‌شه‌نه‌سه‌ندنی دووباره‌ی ڤایرۆسی كۆرۆنا له ‌به‌ندی ژنانی به‌ندیخانه‌ی ورمێ بڵاو كرده‌وه‌، به‌پێی ئه‌م هه‌واڵه‌ موحێبه‌ت مه‌حموودی، یەک لەم به‌ندكراوانە، دوابه‌دوای تووشبوون به‌ كۆرۆنا ڕه‌وانه‌ی نه‌خۆشخانه‌ی زیندان كرا و ماوه‌ی حه‌فته‌یه‌ك له‌ ژووری تاكه‌كه‌سیدا بووه‌ و دووباره‌ گواستراوه‌ته‌وه‌ بۆ به‌ندی گشتی.
له‌كاتی بڵاو بوونه‌وه‌ی ڤایرۆسی كۆرۆنا له‌ ئێراندا، ڕێكخراوه‌كانی داکۆکیکاری مافەکانی مرۆڤ ده‌سه‌ڵاتدارانی ئێرانیان لە بارودۆخی خراپی ته‌ندروستیی زیندانەکانی ئێران و مەترسییەکانی سەر به‌ندكراوان ئاگادار کردبۆوە و هۆشدارییان پێ دابوون. زیندانی ورمێ یه‌كێكە له‌ زیندانه‌كانی ئێران‌ كه‌ دەوترێ تێیدا ژمارەیەکی زۆری زیندانی تووشی‌ ڤایرۆسی كۆرۆنا بوون.
به‌پێی زانیارییه‌كانی تۆڕی مافه‌كانی مرۆڤی كوردستان، له‌ مانگی گوڵانی ئه‌مساڵدا به‌ندكراوێك به‌ناوی فاتمه‌ عه‌لیزاده‌ له ‌به‌ندی ژنانی زیندانی ورمێدا به‌ هۆی تووشبوونەوە به‌ نه‌خۆشیی كۆرۆنا گیانی له ‌ده‌ست داوه‌.