سەرچاوەیەکی ئاگادار لە وتووێژێکدا لەگەڵ تۆڕی مافەکانی مرۆڤی کوردستان، ڕایگەیاند کە ڕەزا مەلازادە، بەندکراوی سیاسیی کورد، لە بەندیخانەی بۆرازجانی پارێزگای بووشێهر تووشی کۆرۆنا بووە.
بە وتەی ئەم سەرچاوەیە، ڕەزا مەلازادە، بەندکراوی سیاسیی کورد کە لە بەندیخانەی بۆرازجاندا حوکمی ١٦ ساڵ زیندانەکەی تێدەپەڕێنێ، لە ڕۆژانی ڕابردوودا تووشی کۆرۆنا بووە. ئەم سەرچاوەیە وتیشی کە بەرپرسانی بەندیخانە ئامادە نەبوون ڕەوانەی نەخۆشخانەی دەرەوەی بەندیخانەکەی بکەن و لەم ماوەیەدا تەنیا چەند جارێک لە لایەن پزیشکانی نەخۆشخانەی بەندیخانەوە پشکنینی بۆ کراوە.
ڕەزا مەلازادە خەڵکی گوندی ئاشناکی سەر بە شاری سەلماسی پارێزگای ئازەربایجانی ڕۆژئاوایە و لە کۆتاییەکانی هاوینی ١٣٩٠ لە نزیک شاری پاوەی پارێزگای کرماشاندا لە لایەن هێزەکانی ڕێکخراوی ئیتڵاعاتی سپای پاسدارانەوە دەستبەسەر کرا. ناوبراو سەرەتا برایە دەستبەسەرگەیەکی ئەمنیەتی لە شاری کرماشان و دوای چەند ڕۆژ گواسترایەوە بۆ دەستبەسەرگەیەکی ئەمنیەتیی دیکە لە تاران.
ئەم بەندکراوە سیاسییە بۆ ساڵێک مۆڵەتی پێوەندیگرتن و دیداری بنەماڵەکەیی پێ نەدرا و لە ساڵی ١٣٩١دا لە لایەن لقی ١٥ی دادگای ئینقلابی تارانەوە بە سەرۆکایەتیی دادوەر “سەڵەواتی”، بە تۆمەتی «موحارەبە لە ڕێگەی ئەندامبوونەوە لە پارتی ژیانی ئازادی کوردستاندا (پەژاک)» حوکمی لەسێدارەدانی بۆ بڕایەوە. ئەم حوکمە دوای تۆمارکردنی فەرمیی ناڕەزایەتی لە دیوانی باڵای ئێراندا کەم کرایەوە بۆ ١٥ ساڵ بەندکردن و دوورخستنەوە بۆ بەندیخانەی بۆرازجان. هەروەها لە دۆسیەیەکی دیکەدا بە تۆمەتی «هاتوچۆی نایاسایی لە سنوورەوە» حوکمی ساڵێک بەندکرانی بە سەردا سەپاوە.
ئەم بەندکراوە سیاسییە دوای پەسەندکرانی حوکمەکەی، لە بەندیخانەی ئێوینی تارانەوە دوور خرایەوە بۆ بەندیخانەی بۆرازجان و لە حاڵێکدا نۆهەم ساڵی بەندکرانی تێدەپەڕێننێ کە مافی ئازادبوونی مەرجدار و پشوو یان مورەخەسیشی لێ زەوت کراوە.