زیندانییه‌كی خه‌ڵكی بۆكان به ‌ناوی ئیسماعیل موسته‌خدم کە حوکمی «قەساسی نەفس» یان هەمان لەسێدارەدانی بۆ بڕابوویەوە، دوای نزیكه‌ی ١٢ ساڵ زیندانیبوون، ڕۆژی ڕابردوو لەبەر تەشەنەسەندنی نەخۆشیی شێرپەنجەکەی،‌ به‌په‌له‌ له‌ زیندانی ته‌ورێزه‌وه‌ ڕەوانەی نه‌خۆشخانه‌ کرا، به‌ڵام له‌وێ گیانی له ‌ده‌ست دا.
سه‌رچاوه‌یه‌كی ئاگادار له‌ بۆكان تۆڕی مافه‌كانی مرۆڤی کوردستانی لەم ڕووداوە ئاگادار كرده‌وه ‌و وتی: «ئه‌م به‌ندكراوه‌ ماوه‌یه‌ك لەمەوپێش و دوای ١٢ ساڵ زیندانیبوون، توانیبووی ڕەزایەتی بنه‌ماڵه‌ی كوژراوه‌كه‌ وەربگرێت و بڕیار وا بوو له‌ ڕۆژانی داهاتوودا ئازاد بکرێ».
به‌ وته‌ی ئه‌م سه‌رچاوه‌یە، ئیسماعیل موسته‌خدم له‌ زینداندا تووشی نه‌خۆشیی شێرپه‌نجه‌ی ریخۆڵه‌ ببوو و له ساڵانی زیندانیكردنیدا مافی پێراگه‌شتن و خزمەتگوزاریی پزیشكیی لێ زه‌وت كرابووه، دواجار ته‌نیا چه‌ند ڕۆژ پێش ئه‌وه‌ی ئازاد بكرێت، لەبەر دژواریی نەخۆشییەکە و ناجێگیربوونی باری تەندروستییەوە ڕه‌وانه‌ی نه‌خۆشخانه‌ی ته‌ورێز كرا، به‌ڵام به‌ هۆی تەشەنەسەندنی نەخۆشییەکە و بڵاوبوونەوەی شێرپه‌نجه‌کە به هەموو‌ جه‌سته‌یدا، گیانی له ‌ده‌ست دا.