بەپێێ زانیارییه‌كانی تۆڕی مافه‌كانی مرۆڤی كوردستان، ڕۆژی ڕابردوو هێزە ئەمنیەتییەکان هاوکات ٥ چالاکی مەدەنیی کوردی خەڵکی سەقزیان بە ناوەکانی ئارمیا ڕەنجبەری، عەلی قادری، هێمن کەریمی، هیوا و وریا ئەمینی دەستبەسەر کردووە و گواستوونیانەوە بۆ شوێنێکی نادیار.
سەرچاوەیەکی ئاگادار لە سەقزەوە ئاگاداری کردینەوە کە ماڵی ئەم کەسانە پشکێنراوە و هێزە ئەمنیەتییەکان دەستیان بە سەر کەلوپەلە شەخسییەکانیاندا گرتووە.
دەوترێت لە ڕۆژی ڕابردووەوە کە بنەماڵەکانی ئەم دەستبەسەرکراونە بەردەوام سەردانی دادگا و ڕێکخراوە ئەمنییەکانیان کردووە، ئیدارەی ئیتلاعاتی سەقز ڕایگەیاندووە کە ئاگایان لە چارەنووسی ئەم کەسانە نییە.
بە پێی ئامارە کۆکراوەکانی تۆڕی مافەکانی مرۆڤی کوردستان، لە مانگی پووشپەڕی ئەمساڵدا لانیکەم ٤١ هاووڵاتی و چالاکڤانی کورد لە شارەکانی کرماشان، جوانڕۆ، ئیسلامئاوای ڕۆژئاوا، کامێران، مەریوان، سنە، سەقز، شنۆ، بۆکان، پیرانشار، سەردەشت و مەهاباد لە پارێزگاکانی کرماشان، کوردستان و ئازەربایجانی ڕۆژئاوا بە دەستی هێزە ئەمنیەتییەکان دەستبەسەر کراون