سه‌ره‌ڕای تێپه‌ڕبوونی زیاتر له‌ مانگێك بەسەر ده‌ستبه‌سه‌ركرانی مێعراج مورته‌زاییدا، هاووڵاتیی كوردی خه‌ڵكی گوندی «دێوه‌زناو»ی سه‌ر به ‌شاری سه‌وڵاوای پارێزگای كوردستان (سنه‌)، هێشتا هیچ زانیارییه‌ك له ‌چاره‌نووسی ناوبراو له ‌به‌رده‌ستدا نییه‌.
به‌پێی زانیارییه‌كانی تۆڕی مافه‌كانی مرۆڤی كوردستان، ڕۆژی سێشه‌ممه‌ ٧ی گه‌لاوێژ مێعراج مورته‌زایی دوای هاتنە دەرەوە لە ئیدارەی شیلاتی سەوڵاوا له‌لایه‌ن هێزه‌ ئه‌منییه‌كانه‌وه‌ ده‌ستبه‌سه‌ر کرا و تا ئێستا مۆڵەتی پێوەندیگرتن لەگەڵ بنه‌ماڵه‌کەیی پێ نەدراوە.
دوای به‌دواداچوون و سه‌ردانی بنه‌ماڵه‌ی ئه‌م هاووڵاتییه‌ به‌ندكراوه‌ بۆ ئیداره‌ی ئیتلاعاتی مه‌ریوان، به‌رپرسانی ئه‌م ڕێكخراوه‌یه‌ ڕایانگه‌یاندووە‌ لانیكه‌م تا یه‌ك مانگی دیكه‌ ده‌ستبه‌سه‌ر ده‌بێ.
ده‌وترێ مێعراج مورته‌زایی دوای ده‌ستبه‌سه‌رکردن ڕه‌وانه‌ی ده‌ستبه‌سه‌رگه‌یه‌كی ئه‌منیه‌تیی شاری سنه كراوه‌. ئه‌م هاووڵاتییه‌ كورده‌ له‌ چه‌ند ساڵی ڕابردوودا لەبەر چالاكییەکانی ئه‌ندامانی بنه‌ماڵه‌کەی له ‌ده‌ره‌وه‌ی وڵات چەندین جار بانگهێشتی دەزگا ئه‌منییه‌كان كراوه‌ و كه‌وتۆ‌ته‌ ژێر لێپرسینه‌وه‌.