به‌پێی زانیارییه‌كانی تۆڕی مافه‌كانی مرۆڤی كوردستان، دوو برا بە ناوەکانی سامان و سالار غەزاڵی کە ٢٦ی خەرمانان لە لایەن هێزە ئەمنییەکانەوە لە شاری مەهاباد دەستبەسەر کرابوون، بەبێ ئەوەی مۆڵەتی پێوەندیگرتن یان دیداری بنەماڵەیان پێ بدرێت هێشتا هەر لە دەستبەسەرگەی ئیدارەی ئیتلاعاتی ورمێ ڕاگیراون.
سامان غەزاڵی خوێندکاری دوایین تێرمی ماستەری کۆمەڵناسییە لە زانکۆی برووجێرد و سالار غەزاڵیش دەرچووی ماستەری کیمیایە لە زانکۆی ڕازی.
ئەم دوو چالاکە مەدەنییە دوای دەستبەسەربوون گوسترانەوە بۆ دەستبەسەرگەی ئیدارەی ئیتلاعاتی ورمێ و تا ئێستا بە تۆمەتی هاوکاریکردنی حیزبێکی ئۆپۆزیسیۆنی کوردی لە ژێر لێپرسینەوەدان. تا ئێستا بەدواداچوونەکانی بنەماڵەکەیان بۆ وەرگرتنی زانیاری لەسەر بارودۆخی منداڵەکانیان بێ‌ئاکام بووە.