بەرەبەیانی ئەمڕۆ سێشەممە ١٩ی بەفرانبار (٩ی ژانڤییە) سزای لەسێدارەدانی بەندکراوێک بە ناوی محەممەدعەلی میرزایی کە پێشتر بە تۆمەتی پێوەندیدار بە «مادە هۆشبەرەکان»ـەوە سزای لەسێدارەدانی بۆ دەرچووبوو، لە زیندانی قزلحەساری کەرەج جێبەجێ کراوە.
بەپێی ئەو زانیاریانەی کەوتووەتە دەست تۆڕی مافەکانی مرۆڤی کوردستان، ئەم زیندانییە ڕۆژی ڕابردوو لەگەڵ لانیکەم زیندانییەکی تردا بە مەبەستی جێبەجێکردنی سزاکە ڕەوانەی ژووری تاکەکەسیی زیندانی قزلحەساری کەرەج کرابوون و محەممەدعەلی میرزایی بەرەبەیانی ئەمڕۆ لە سێدارە دراوە.
لەسەر ناسنامە و چارەنووسی زیندانییەکەی تر تا ئێستا هیچ زانیارییەک بەردەست نەکەوتووە.
محەممەدعەلی میرزایی، خەڵکی شاری نوورئابادی پارێزگای لوڕستان، چەند ساڵ لەمەوپێش بە تۆمەتی پێوەندیدار بە «مادە هۆشبەرەکان»ـەوە دەستبەسەر کرابوو و سزای لەسێدارەدانی بۆ دەرچووبوو.
