ڕۆژی پێنجشەممەی ڕابردوو حه‌سه‌ن جه‌نگخا، مه‌لای ئایینیی کورد کە لەلایەن هێزه‌ ئه‌منییه‌كانی ئیداره‌ی ئیتلاعاتی ورمێ ده‌ستبه‌سه‌ر کرابوو، دوای تێپەڕینی حه‌فته‌یه‌ك به‌دانانی بارمته‌ ئازاد كرا.
سه‌رچاوه‌یه‌كی نزیك له‌م مه‌لای ئایینییه‌ دوای پشتڕاستكردنه‌وه‌ی ئه‌م هه‌واڵه‌ به‌ تۆڕی مافه‌كانی مرۆڤی كوردستانی وت: «مامۆستا حه‌سه‌ن جه‌نگخا، خه‌ڵكی گوندی حه‌وتخانی سەڵماسه‌ کە ٢٩ی گه‌لاوێژ له ‌كاتی ڕۆیشتندا بۆ گوندی دزه‌ی مه‌رگه‌وه‌ڕی ورمێ، ده‌ستبه‌سه‌ر كرا و ڕه‌وانه‌ی ده‌ستبه‌سه‌رگه‌ی ئیداره‌ی ئیتلاعاتی ئه‌م شاره‌ كرابوو».
به‌ وته‌ی ئه‌م سه‌رچاوه‌یه‌، ناوبراو له ‌ماوه‌ی حه‌فته‌یه‌ك ده‌ستبه‌سه‌ربووندا له‌به‌ر ئەوەی لە ئاست كوشتنی كۆڵبه‌ران و كاسبكارانی مه‌رزیدا ناڕەزایەتیی دەربڕیبوو کەوتبووە ژێر لێپرسینەوە و تۆمەتی ئەوەیان لێ دابوو کە له‌ تۆڕه‌ كۆمه‌ڵایه‌تییه‌كاندا له‌گه‌ڵ حیزبه‌ كوردییه‌كاندا پێوەندیی هەیە.
ئه‌م سه‌رچاوه‌یه‌ له‌ درێژه‌دا ڕایگه‌یاند کە مامۆستا حه‌سه‌ن جه‌نگخا ڕۆژی پێنجشەممە به ‌دانانی بارمته‌ی ٣٠٠ میلیۆن تمه‌نی ئازاد كرا و دۆسیه‌كه‌ی ڕه‌وانه‌ی دادگای تایبەتی مەلایانی ئایینیی ورمێ كراوه‌.