دەمەوبەیانی ئەمڕۆ ٨ی گەڵاڕێزان، چوار زیندانی بە ناوەکانی مووسا ڕەحمانی، یاسر چشم‌ئەنوەر، عەلی مەلێکزادە و زەینەلعابدین حسەینزادە کە ڕۆژی ڕابردوو بۆ جێبەجێکردنی حوکمەکەیان گواسترابوونەوە بۆ ژووری تاکەکەسی، لە زیندانی ناوەندیی ورمێ لە سێدارە دران.
به‌پێی زانیارییه‌كانی تۆڕی مافه‌كانی مرۆڤی كوردستان، ڕۆژی ڕابردوو ئەم چوار بەندکراوەی بەندی ١-٢ لەگەڵ بەندکراوێکی‌تردا لە بەندی کاریگەری بە ناوی مورتەزا نووری بۆ جێبەجێکردنی حوکمەکەیان گواسترابوونەوە بۆ ژووری تاکەکەسی.
یاسر چشم‌ئەنوەر، عەلی مەلێکزادە و زەینەلعابدین حسەینزادە نزیکەی ٦ ساڵ لەمەوپێش بە تۆمەتی کوشتنی ٥ کەس لە ورمێدا حوکمی ئێعدام لە بەرچاو خەڵکیان بۆ دەرچووبوو، بەڵام لەبەر کەوتنەوەی پەتای کۆرۆنا و ناڕازیبوونی داواکاری گشتیی ورمێ، لە ناو خودی زیندانەکەدا لە سێدارە دراون. زیندانییە لەسێدارەدراوەکەی‌تر مووسا ڕەحمانی و خەڵکی ورمێ بوو کە چەند ساڵ لەمەوپێش بە تۆمەتی کوشتنی بەئەنقەست حوکمی قەساسی نەفس (لەسێدارەدان)ی بۆ دەرچووبوو.
مورتەزا نووریش کە شەوی ڕابردوو لەگەڵ ئەم چوار کەسەدا بۆجێبەجێکردنی حوکمەکەی گواسترابوویەوە بۆ ژووری تاکەکەسی. ڕەزایەتی خاوەن خوێن یان هەمان ئەولیای دەمی بە دەست هێنا و گەڕێنرایەوە بۆ بەندی کاریگەری.
تۆڕی مافه‌كانی مرۆڤی كوردستان شەوی ڕابردوو بە بڵاوکردنەوەی ڕاپۆرتێک ڕایگەیاند کە عەلی مەلێکزادە لە ژووری تاکەکەسیدا هەوڵی خۆکوشتنی داوە. ناوبراو لە کۆتاساتەکانی شەوی ڕابردوودا بە بڕینی دەماری دەست لە ژووری تاکەکەسیدا هەوڵی خۆکوشتنی دابوو کە دوای ئەوەی برایە نەخۆشخانە و برینەکەی پانسمان کرا، دیسان گەڕێنرایەوە بۆ ژووری تاکەکەسی.