سه‌رله‌به‌یانیی ڕۆژی ٥ی خه‌رمانان هێزه‌كانی پاسه‌وانی سنوور له‌ ناوچه‌ی سنووریی نه‌وسوود له ‌پارێزگای كرماشان، به‌ چه‌كی ساچمه‌زه‌ن ته‌قه‌یان له‌ كاروانێكی كۆڵبه‌ران كردووه‌ و چوار كۆڵبه‌ریان بریندار کردووە.
كۆڵبه‌رێك له‌ ناوچه‌ی نه‌وسوود دوای پشتڕاستكردنه‌وه‌ی ئه‌م هه‌واڵه‌ به ‌تۆڕی مافه‌كانی مرۆڤی كوردستانی ڕاگه‌یاند: «كاتژمێر یه‌كی سه‌رله‌به‌یانیی ڕۆژی چوارشه‌ممه‌ ٥ی خه‌رمانان، هێزه‌كانی پاسه‌وانی سنوور له‌ مه‌ودایه‌كی نزیكه‌وه‌ به‌ چه‌كی ساچمه‌زه‌ن كاروانێكی كۆڵبه‌رانیان دایه‌ به‌ر ته‌قه‌ و به‌هۆی ئه‌و ته‌قه‌لێكردنه‌وە چوار كۆڵبه‌ر به ‌ناوه‌كانی قانێع به‌هرامی، فه‌رزاد له‌تیف، عه‌لی ڕه‌نجبه‌ر و ناجێح كورده‌ بریندار بوون».
ئه‌م كۆڵبه‌ره‌ له‌ درێژه‌ی قسه‌كانیدا وتی: «ژماره‌یه‌ك له‌ كۆڵبه‌ره‌كان کە بریندار ببوون، لە تاریکیی شەو کەڵکیان وەرگرتووە و له‌ ترسی ئه‌وه‌ی‌ ده‌ستبه‌سه‌ر نه‌كرێن له‌ ناوچه‌كه‌ دوور كه‌وتوونه‌ته‌وه‌، هەر بۆیە ئه‌گه‌ری ئه‌وه‌ هه‌یه‌ كه‌ ژماه‌ی برینداره‌كان زیاتر له‌وه‌ش بێ كه‌ ڕاگه‌یه‌نراوه‌».
به‌وته‌ی ئه‌م سه‌رچاوه‌یە كۆڵبه‌ره‌ برینداره‌كان خه‌ڵكی گونده‌كانی سه‌ر به‌ سه‌لاسی باوه‌جانی و مه‌ریوانن كه ‌به ‌هۆی بێكارییه‌وه،‌ له‌ ناوچه‌ سنوورییەکانی هه‌وراماندا کاری‌ كۆڵبه‌ری دەکەن.
تۆری مافه‌كانی مرۆڤی كوردستان، ٢ی خه‌رمانانیش هه‌واڵێکی هاوشێوەی بڵاو کردەوە کە هێزه‌كانی پاسه‌وانی سنوور به‌ چه‌كی ساچمه‌زه‌ن تەقەیان له ‌كاروانێكی كۆڵبه‌ران كردووە‌ و‌ به‌ هۆی ئەم تەقەکردنەوە‌ كۆڵبه‌رێك به‌ ناوی بێهروز مورادی بریندار بووه‌.