به‌پێی زانیارییه‌كانی تۆڕی مافه‌كانی مرۆڤی كوردستان، ئێواره‌ی رۆژی ڕابردوو ٢٥ی گه‌ڵاڕێزان، گرووپێکی كۆڵبه‌ر له‌ ناوچه‌ی سنووریی «سه‌رته‌زێن»ی شاری بانه‌ی پارێزگای كوردستان كه‌وتوونەتە‌ به‌ر ته‌قه‌ی هێزه‌كانی پاسەوانی سنوور و كۆڵبه‌رێك به‌ ناوی نه‌جمه‌دین مورادی بریندار بووه‌، ئه‌م كۆڵبه‌ره‌ به‌ مه‌به‌ستی وەرگرتنی چاره‌سه‌ر و دەرمانکردن گواستراوه‌تەوە بۆ نه‌خۆشخانه‌یه‌كی شاری‌ بانه‌. 
پێشتر، له‌ ڕێكه‌وتی ٧ی گەڵاڕێزان، خەسرەو شەریفی کە بە ئۆتۆمبیلەکەی خۆی سەرقاڵی گواستنەوەی موسافر بوو، لە نزیک گوندی «کێلە» کەوتە بۆسەی هێزەکانی پۆلیس و بەرەنگاربوونەوەی کاڵای قاچاخەوە و لە حاڵێکدا کە ئۆتۆمبیلەکەی ڕاگرتبوو، تەقە لە سەری کرا كه‌ بووە هۆی‌ برینداربوونی و دوای ١٠ ڕۆژ مانه‌وه‌ له‌ نه‌خۆشخانه‌ گیانی له‌ ده‌ست دا.