به‌پێی زانیارییه‌كانی تۆڕی مافه‌كانی مرۆڤی كوردستان،ڕۆژی ڕابردوو ٥ی سەرماوەز دوو هاووڵاتیی کورد بە ناوەکانی سامان ئەسەدحەکیم و محەممەد شافعی‌زادە دوای ٢٠ ڕۆژ بە دانانی بارمتە لە زیندانی مەریوان ئازاد کراون.
ئەم دوو هاووڵاتییەی خەڵکی گوندی «دێوەزناو»ی شاری سەوڵاوای پارێزگای کوردستان، ١١ی گەڵاڕێزان لە لایەن هێزە ئەمنییەکانەوە دەستبەسەر کرابوون و گواسترابوونەوە بۆ دەستبەسەرگەی ئیدارەی ئیتلاعاتی مەریوان.
لە چەند مانگی ڕابردوودا ٤ هاووڵاتیی دیکەی دانیشتووی ئەم گوندە بە ناوەکانی مێعراج مورتەزایی، هیوا عەزیزپوور، نەسروڵڵا حەیدەرنژاد و فەرمان حەیدەرنژاد لە لایەن هێزەکانی ئیدارەی ئیتلاعاتی مەریوانەوە دەستبەسەر کراون. مێعراج مورتەزایی، هیوا عەزیزپوور و نەسروڵڵا حەیدەرنژاد دوای دوو مانگ دەستبەسەربوون بە دانانی بارمتە ئازاد کران، بەڵام تا ئێستا هیچ زانیارییەک لەسەر چارەنووسی ئەو هاووڵاتییەکەی‌تر لە بەردەستدا نییە.
