به‌پێی زانیارییه‌كانی تۆڕی مافه‌كانی مرۆڤی كوردستان، له‌ كۆتاییه‌كانی مانگی پووشپه‌ڕی ئه‌مساڵدا هاووڵاتییه‌كی كورد به‌ ناوی حه‌مید عه‌بدی له ‌لایه‌ن لقی سێی دادگای ئینقلابی ئیسلامیی ورمێوه‌ به‌ سه‌رۆكایه‌تیی دادوه‌ر نه‌جه‌فزاده‌، به‌ تۆمه‌تی «چالاکی‌ی دژی ته‌ناهیی نه‌ته‌وه‌یی لە ڕێگەی ئه‌ندامبوونەوە له‌ پارتی ژیانی ئازادی کوردستاندا (پژاك)» حوکمی ١٥ ساڵ بەندکرانی بە سەردا سەپاوە.
ئه‌م هاووڵاتییه‌ كورده‌ خه‌ڵكی گوندی نه‌ناسی ورمێیە له‌ پارێزگای ئازه‌ربایجانی رۆژئاوا‌ کە خه‌زه‌ڵوه‌ری سا‌ڵی رابردوو له ‌لایه‌ن هێزه‌كانی ڕێكخرای ئیتلاعاتی سپاوه‌ ده‌ستبه‌سه‌ر و بۆ ماوه‌ی زیاتر له‌ دوو مانگ له‌ ده‌ستبه‌سه‌رگه‌ی ئه‌و دەزگا سه‌ربازی- ئەمنییه‌دا كه‌وته‌ ژێر لێپرسینه‌وه‌. ناوبراو پاش كۆتاییهاتنی لێپرسینه‌وه‌كان، ڕاپێچی به‌ندیخانه‌ی ناوه‌ندیی ورمێ کرا و دوای نزیكەی ٤ مانگ به‌ دانانی بارمته‌ ئازاد کرا. حه‌مید عه‌بدی له‌ گوڵانی ئه‌مساڵدا جارێكی دیكه‌ له ‌لایه‌ن هێزه‌ ئه‌منییه‌كانه‌وه‌ ده‌ستبه‌سه‌ر و ڕه‌وانه‌ی به‌ندیخانه‌ی ناوه‌ندیی ورمێ‌ كرایه‌وه‌.
پاش تۆمارکردنی فەرمیی ناڕه‌زایی لەو حوکمە‌ له‌ لایه‌ن پارێزه‌ری ئه‌م هاووڵاتییه‌ كورده‌وە، كه‌یسەکه‌ ڕه‌وانه‌ی دادگای پێداچوونه‌وه‌ی ورمێ‌ كراوه‌.